【新手媽媽】女人最痛 坐月期間會陰裂傷

 我在旺角某間公立醫院生產,聽講婦產科一流,所以就揀咗佢,但大家又估下係唔係呢?不過呢個唔係今次嘅重點,重點係我最驚嘅事發生咗,會陰傷口起幾日之後爆咗!

 

第一:點解知道會陰爆咗?


其實生完之後的12小時,麻醉藥開始退散才覺得會陰傷口痛,覺得好唔舒服,再加上惡露那種濕濕笠笠,真的會令人發狂,而且仲要湊BB、做少少執頭執尾嘅野,終於,有次唔小心大動作,個傷口好似有一種損咗嘅感覺,好擔心,忍唔住去睇私家婦科醫生,一睇,唉,真係爆咗少少,那一刻心情真的低到一個點,最唔想嘅事發生咗。

 

第二:點處理?


婦科醫生畀咗抗生素和消毒藥水給我服用及清潔護理。我當然乖乖食藥和消毒,唔想傷口受感染及惡化,但日子真係好難捱,唯有勤力啲換M巾保持清潔。而且仲有一個要留意嘅地方,就係沖洗的水不可以太熱,因為醫院話個埋口線到某一個溫度有可能會溶...

 

第三:公立醫院幫到你?


除咗睇私家醫生,醫院會在出院時俾個熱線你,話有咩唔妥就打去問啦,於是我就算睇咗私家醫生,亦致電醫院問,我話傷口爆咗可以點?佢第一句問番我,「你點知傷口爆咗?」 我話我睇完私家醫生,最後佢嘅回覆係,「咁你都做啱咗,因為我地都係叫去睇私家醫生,一係睇急症」 於是我好無奈咁收線...

 

第四:傷口出現肉芽


過咗漫長嘅兩星期,終於埋咗口,個心都安穩少少,但係都仲覺得有點不適,去多次私家醫生檢查,原來有粒肉芽,係因為傷口埋得唔好而出現嘅,醫生好好人咁幫我即場處理咗,再等多兩星期,我個「妹妹」終於好番,即係產後一個月,傷口才回復正常,唔怪得坐月要一個月啦。這些產後護理和困擾真係要一早知道,而老公在產後階段嘅陪伴與支持係最重要,每次我唔舒服,佢都會開解我,我才可以捱到落去!

 

 

20190115 9722 01

作者:Teresa Mama

          一年內結婚生b完成人生大project,但驚覺才是人生新開始的在職媽媽

田叔叔英語閱讀計劃2023-24
田叔叔英語閱讀計劃2023-24
 親子最關注
香港優質教育機構巡禮 2024