2021-04-15, 週四

【媽咪我唔剪呀】BB剪指甲須知

初生BB手仔腳仔又幼又細,啲指甲更加係細粒到粟米咁,幫佢哋剪指甲真係一剪一驚心。如果可以,真係想當睇唔到就算,但指甲太長又驚佢抓親自己同藏污垢…

不過,其實初生BB其實唔太需要剪指甲,滿月後可以稍微為佢修一修啲指甲仔,直到3至4個月時,小朋友先需要剪指甲,到時媽媽先至按指甲生長速度嚟剪。

一般手指甲生長較快,一星期就要修1到2次;腳甲就大概1個月修剪1次就夠。

不過,BB指甲始終都係細,應該點剪好呢?

【親子交流】BB剪指甲須知

選用嬰兒指甲鉗

嬰兒專用指甲鉗專門針對BB嘅小指甲而設,剪出嚟指甲弧度會比較圓潤,加上嬰兒指甲鉗頂部多為鈍頭,咁就無咁易會剪親,或戳親小朋友啦。

剪完一隻換一隻

建議家長最好先將BB五指分開,重點捉住佢一隻手指嚟剪,而唔好一排手指咁握住,因為如果小朋友忽然郁動,剪時就好易誤傷其他指甲。

避免剪得太入肉

要留心,指甲兩側唔好剪得太深,否則好易造成「嵌甲」,嵌甲會令指甲變型,傷害到指甲周圍皮膚,令附近範圍發炎,或造成甲溝炎。