2019-09-19, 週四

【史高治叔叔】新識內地朋友 第一句就話:香港好落後!

20190703 10543 C 00

老友問史高治有無興趣去ball識新朋友,嗰個場合有好多大公司高層,史高治當然有興趣去派吓卡片,睇吓搵唔搵到客仔。所以一於放低小朋友喺外父外母度,同老婆出去social。

老友當日介紹咗唔少朋友我識,新朋友又會介紹啲新朋友,短短一晚就識咗唔少猛人。其中有一位新朋友特別印象深刻,因為佢見面第一句就同我講:「其實香港已經好落後!」聽佢廣東話帶幾分口音,就知係來自內地嘅朋友,望一望,係個30出頭嘅年輕人,心諗:「乜而家啲內地年輕人興咁樣打開話題?」

再睇真啲,見佢身高5呎8,打扮都算有品味,言談都唔似寸寸貢嘅人,所以史高治就好有禮貌咁回應:「係?願聞其詳。」原來呢位仁兄係內地某大電子支付系統嘅香港分部高層,嚟香港就係為咗搞電子支付同虛擬銀行。史高治立時就明多少少,心中暗忖:「唔怪得咁講啦。」

記得早兩年有位雷教授,話內地叫X都可以用電子支付,當然啦,呢位新朋友冇咁低俗,話晒都係海歸派,談吐溫文有禮。佢其實只係想認真講下內地電子支付發展有幾快,之所以第一句就語出驚人,目的就係想吸引史高治同身邊嘅人注意,再發表香港同內地電子支付發展相差甚遠嘅偉論。

20190703 10543 k01

佢絕對冇誇張,其實有返過大陸嘅朋友都知道,內地電子支付真係好發達。好似上個月同老婆、小朋友返大陸玩,朋友揸車接送,我哋入去一個大商場停車場,就咁直入就得,車窗都唔使校低。入到去呢,好多地方都會見到二維碼,掃一掃入返車牌同俾錢,走嗰時直接走就得。香港?大家都知啦,出同入停車場都要先開車窗拍八達通,有時見啲大車司機要專登落車拍卡,如果係露天車場,落起雨嚟都幾麻煩。我試過去新X基旗下一個大商場,淨係排隊出車都搞成10分鐘!

其實兩地有呢個差別一啲都唔難理解,因為愈遲發展嘅地方,一旦發展起嚟,要用就用最新嘅嘢。回想當年,我哋97年開始用八達通,當時已經係好先進系統,甚至今時今日,都仲比唔少歐洲國家方便。舊年我成家人去意大利旅行,喺羅馬搭巴士就要專登去煙草店買車飛,一程一張,車飛去到另一個地區已經唔啱用,又要買另一款。如果唔去買定車飛,即使你有錢都唔知點搭巴士。當時我都忍唔住爆咗句:「意大利好落後。」不過諗深一層,絕對唔應該咁講,始終人哋係一個歷史文化背景深厚嘅地方,係文藝復興之地,幾多出色文學家、雕塑家、畫家、建築師留低嘅作品,吸引全世界遊客慕名而來,又點可以咁井底之蛙話人落後?

我就認為,每個地方都有值得學習同欣賞嘅一面,我哋香港當然有本身嘅優勢,作為香港人,首先唔可以妄自菲薄;至於內地嘅發展,無錯真係好快好發達,但係香港就有近水樓台先得月嘅優勢,較容易接觸到外國有咩正嘢可以參考,睇吓點樣好好利用,人哋點講咪得個聽字,自己繼續做好本分,香港人要一齊加油呀!

 

作者:史高治叔叔
   後生嗰陣,大學一畢業就入咗大銀行商業部做Sales,跟一班有名有利嘅客人打交道,有時可以跟埋一齊飲飲食食,花天酒地、燈紅酒綠嘅生活,造就今日呢個身經百戰又識玩識食嘅叔叔。不過自從做咗老竇之後,史高治叔叔修心養性,決定將行內鮮為人知嘅見聞,喺專欄裡面一一公開。

×