2019-08-26, 週一

【史高治叔叔】阿囡想養狗 勾起我在玉林慘痛回憶

20190704 10596 C 00

尋日阿囡突然話:「爸爸,不如養隻狗仔,我好想養寵物呀。」

細路女梗係鍾意小動物,覺得得意又好玩。不過,作為負責任嘅家長,養之前真係要停一停想一想,養寵物係一生承諾,小朋友未必諗到到時要定時餵狗、放狗,仲要執便便,嗰種責任未必維持到,所以千祈唔好因為氹細路歡心就隨便搵隻狗返嚟養。

聽完我講,阿囡嘴扁扁冇晒心機,我就話:「嗱,我帶你去動物協會,試下做一日動物義工,你體驗過覺得可以照顧到狗狗嘅,我哋再決定啦。」於是我就同阿囡去咗灣仔SPCA。佢果然係我個囡,愛心爆棚,同小動物玩得好開心,不過佢唔知道企喺一邊睇住佢玩嘅爸爸,見到可愛嘅狗仔,就諗起一個好痛苦嘅經歷……

20190719 10596 k01

幾年前,史高治到廣西去睇個客間廠,睇完廠,個客就好熱情要請食飯,就上咗佢架車。架車行行吓,史高治開始覺得唔對路,一次又一次見到路邊有一隻隻全身僵硬嘅狗,死咗㗎!仲有人拎住刀!痴線!佢哋當街當巷劏狗呀!個胃即刻反咗!好想嘔!
好努力咁扮鎮定,問個客:「老闆,我們要去哪兒?」
「去玉林,吃飯。」
「吃甚麼?」
「吃狗。」
好肯定係聽到佢講個「狗」字,史高治立即講:「不了,我們香港人不吃狗。」
「我知道呀,所以特別帶你過來吃,香港不能吃,來廣西吃。」
「不用啦,我不吃了。」
「別~怕~,到了夏至,荔枝配狗肉,以火攻火。」
「真的不用了,我不習慣吃這些。」
「真的不用怕,好吃的。」
呀!我唔想食,做咩要逼我?
「不如,我們吃其他吧!素一點就好了。」
「都來到了,別怕,吃一點!」
終於喺一間餐館前停低,出面已經見到一籠狗,啲毛好污糟好亂,一個籠仔困住十幾隻狗!逼到鬼咁可憐。佢哋同喺香港見到嘅狗完全唔同,香港啲狗好活潑,會搖頭擺尾,伸吓脷仔,仲會黐埋嚟撩人玩,史高治雖然無養狗,但都有同朋友啲狗玩,仲有見過導盲犬陪住啲失明人士,幫主人走出社區。狗真係人類嘅忠心好朋友。但係,呢度啲狗,佢哋眼裡面一啲神采都無,全部係絕望嘅樣,佢哋好似知道自己會遭遇不幸!

史高治雙眼已經濕咗,當見到餐館老闆,就忍唔住問:「為什麼你們可以接受吃狗?」

佢仲笑住話:「這裡吃狗是合法的。」
史高治真係頂唔到,就算得罪個客都要拒絕,講:「我不吃,我要先回酒店。」
「別掃興嘛,真的好吃的,所謂狗肉滾三滾,神仙站不穩,你吃過就知好。」
「不!」史高治大叫咗一聲,相信當時面色好差,佢最終都送我返酒店,當晚我咩都唔想食。一靜落嚟,我就諗起籠中每一隻狗,每隻狗個樣,我都記得一清二楚!諗諗吓,就喊咗出嚟,嗰一晚,史高治一個大男人喊到眼都腫埋,喊咗好耐都收唔到聲,我永遠都記住嗰一晚。一晚真係好長,我一直諗緊呢一晚,唔知有幾多隻狗俾人殘殺咗。
我只可以喺夢裡同啲狗狗講:「下世唔好投胎去大陸,近近地去香港都無咁慘。」
幾年啦,咁就過咗幾年,當年情境仍然歷歷在目,雖然已過幾年,但睇新聞,仍見到今年玉林有狗肉節……對唔住,除咗寫出嚟叫人關注,運用輿論壓力,我仲可以做啲咩?

 

作者:史高治叔叔
   後生嗰陣,大學一畢業就入咗大銀行商業部做Sales,跟一班有名有利嘅客人打交道,有時可以跟埋一齊飲飲食食,花天酒地、燈紅酒綠嘅生活,造就今日呢個身經百戰又識玩識食嘅嘅叔叔。不過自從做咗老竇之後,史高治叔叔修心養性,決定將行內鮮為人知嘅見聞,喺專欄裡面一一公開。

×