2019-09-18, 週三

【珍寶豬欄】溝通唔到喎!小姐

喺一個落雨濕濕嘅下午,一位媽媽抱住bb女嚟到診所。

20160602 3542 A1

媽媽好緊張:姑娘,我個女唔知做乜呀?

我企起身望望bb:小朋友乜事啊?

媽媽:佢瞓得好奇怪呀!

我個頭充滿問號:吓?瞓得好奇怪?

媽媽連珠炮炮我,爭啲一身子彈孔:你呢個係乜反應?我嚟求醫,你質疑我?唔係你個女你梗係唔緊張啦!你試吓生呀!你唔好生呀!你生咗肯定整死個女!

一時嗌我生,一時嗌我唔好生,好難捉摸呀!老實說,我明白新手媽媽係會比較敏感同精神繃緊⋯

我:我唔係咁嘅意思,只係想問瞓得有乜奇怪⋯

媽媽:奇怪囉!奇怪有得形容㗎咩?

妖!老規矩呀唔好煩啦!

我:哦,咁登記咗先,俾醫生睇睇~

媽媽望望醫生卡片上嘅「銜頭」:佢係咪睇bb都得㗎?

我:可以俾醫生睇咗先啦,平時醫生都有睇bb㗎~

媽媽環視診所內四周:一日有幾多個bb嚟睇呀?呢度全部大人嚟嘅?

我:都有幾個嘅,因為我哋唔係主要睇兒科嘛~

媽媽:吓?冇牌㗎?冇兒科牌可以睇bb㗎咩?冇拎嗰科嘅牌開藥有冇犯法?

⋯乜嘢呀?全科咪包括哂所有囉?只係唔夠「專」啫,點犯法呀?唔通感冒又一科,冇發燒嘅傷風又一科咁呀?咁個個醫生讀完都可以直入棺材瞓覺豬啦~

我:全科醫生係可以睇小朋友嘅⋯

媽媽:咁兒科啲醫生係乜?

不如你直接去兒科啦,何苦強求呢?我print都print唔切個「牌」呀⋯

我:如果你擔心嘅,一係直接搵兒科醫啦~

媽媽望吓bb女:bb應該算兒科啦?

我:好肯定係

媽媽抱住bb邊離開邊自言自語:瞓到咁奇怪會唔會唔係睇兒科㗎⋯

其實點奇怪法啫?

×