一個媽媽帶住個幾歲女嚟陪佢醫生,入到醫生房,媽媽同女講:「同醫生哥哥講早晨呀~」

 3852 000

女好乖巧:「醫生哥哥早晨」

喺診症期間呢對母女都好好禮貌,唔該前唔該後。

到岀到嚟拎藥俾錢時,個女同我講:「唔該姐姐~」

我:「乖~唔駛客氣~」

媽媽立即阻止:「唔駛同佢講唔該㗎~」

哦?點解呢?呢位媽媽可唔可以講俾我知點解呢?我好想知喎~

女一臉疑惑完全唔知做錯乜,媽媽補充:「唔需要個個人都理,陌生人更加唔駛理,知唔知呀?周圍同人講嘢會有拐子佬捉走你㗎!」

我又幾時變咗拐子佬呢?好啦喎,你哋平時要我硬食『你唔乖嘅,姑娘會同你打針㗎,你睇,姑娘望你啦!』或者『姑娘姨姨好惡㗎,會打唔乖嘅細路㗎』,我都已經好無奈,而家仲做埋拐子佬,我好忙呀喂,醫生!我要去買戲服呀!

女用天真無邪嘅樣望一望我,媽媽拉開阿女到一邊教育教育,仲要講得一啲都唔細聲,聲量完全俾我同其他病人聽得清清楚楚:「媽咪同你講呀,有啲人你係可以唔駛理,即係啲冇作用嘅人你係可以唔理,明唔明?我用呢間診所做比喻,你知唔知診所入面最大最高級嘅係邊個?」

女擰擰頭。

媽:「頭先見到嗰個醫生哥哥囉,所以媽咪有同佢講早晨講唔該囉,係咪?」

女點點頭。

媽:「你有冇見過媽咪同頭先個姨姨(即係我)講唔該呀?冇呀嘛,所以佢係冇作用嘅,明唔明呀?」

我對你嘅指控作出強烈反對!一條底褲都有佢嘅用途啦,你唔著關我叉事呀?

呢個時候,坐喺角落嘅病人要爆了:「你咁L樣教細路㗎咩?」

媽媽:「我點教女關你乜事呀?」

另一個病人:「呢啲人唔駛幫佢教女㗎,會自己受返㗎!到佢老咗,就有排受!」

媽媽拉住個女邊走邊講:「你哋有病睇醫生啦!」

其實,你自己啱啱都睇完。

會員評分: 0 / 5

不啟用星號不啟用星號不啟用星號不啟用星號不啟用星號不啟用星號
 
×