2019-12-15, 週日

【甘寧老師】不是父母的父母

香港地做人父母甚艱難,惡劣嘅社會風氣同環境,逼使好多父母做出明知不可為而為之嘅事情,例如瘋狂報讀補習班之類。父母一詞,係以前嚟講除左係解作雙親子外,更加係指養育子女成長嘅人,但依家似乎已經淡化左後者。

 20160906 4555 A1

工作逼人,即使已經身為中產人士都冇得鬆懈,父母陪唔到仔女玩,於是出現左Playgroup、N班,搵錢去比錢人陪仔女玩;父母照顧唔到仔女,於是聘用工人姐姐或交由長輩照顧。感情係需要透過相處接觸、良好溝通去建立,如果想係股票市場賺一筆要投資金錢,係感情世界就要投資時間。

雖然仔女長大後,生性嘅都會明白同體諒父母苦況,但眼見仔女同爺爺嫲嫲甚至工人姐姐相處更加自然,心裹百般滋味在心頭。

 

既然相處時間無可避免咁減少,咁作為父母自然要提高相處同溝通質量,控制好自己情緒唔好係又鬧唔係又鬧,好似仔女係公園玩唔小心整親自己,你鬧佢:「做咩咁唔小心,叫左你唔好跑咁快!」其實唔單止表達唔到你內心關切嘅諗法,更加會令仔女覺得父母係一個怪人!

「乜整親自己都要比人鬧,個世界發生左咩事?」

而香港家長普遍比較內斂,對年幼小朋友其實可以多將「愛」宣之於口,攬、抱、錫都係直接嘅表達方式之一。

一位好嘅朋友講求交心,即使日日相處都可以係酒肉朋友,父母亦如是,真係做唔到陪伴子女成長嘅父母,不妨盡自己最大努力,成為子女的交心父母。

圖片:陳維旭