2019-12-15, 週日

【甘寧老師】讀個書啫洗唔洗咁

相信大家都有聽過物極必反呢個詞語,日常生活中都可以印證到呢句說話嘅真偽!例如每日一小杯紅酒係一件有益身心嘅事,但當我地越飲越多演變成酗酒,結果係好係壞大家心知肚明。

 20160919 4665 A1

世上幾乎所有野都離唔開「物極必反」呢個原則,同樣地「比較」都一樣!當社會上所有人都被逼沉醉於係「比較」之中,聰明嘅人會用適量「比較」去激發良性競爭,笨拙嘅人就會被「比較」牽著鼻子走,永遠活係人地陰霾之下。

首先家長一定要接受世界係唔公平嘅,除左家境之外,小朋友資質都各有不同,而最成功嘅家長就係幫自己仔女潛能最大化發揮。

現時社會乜都講求多元化,家長嘅「比較」都應該多元化,唔好再偏重比較「學術」,可以比較一下禮貌,比較一下你仔女最擅長嘅踢波、畫畫,「比較」可以打擊一個人,都可以給予到一個人成功感,平衡二者就係最好嘅「比較」。

依家整個社會已經比較到出現病態,窮人用自己比較中上流人士,因而會用盡方法令子女去上流;已經係上流嘅人,一方面低頭俯瞰基層人士,絕對唔會允許自己仔女向下跌一級,一方面抬頭追趕更高尚之人。

兩者之共通點在於唔清楚自己目標,盲目比較,甚至不少人回頭一看,原來自己一早已經活係自己理想中嘅生活而不自知。

比較導致嘅催谷心態唔單止辛苦自己仔女,身為家長都絕對唔好受!甚至有家長會為咗幫仔女入心儀幼稚園,不惜做出踩界行為討好校方送禮,有見及此,ICAC今年七月份已經係幼教界推廣《幼稚園校董及職員行為守則範本》,減低貪腐風險。

當「比較」心態反展到極致嘅時候,原來已經可以影響到我地香港核心嘅廉潔價值,其實係一件好可悲嘅事情,其實讀個書啫,大家放鬆少少好唔好!

圖片:Blondinrikard Fröberg