2019-12-16, 週一

【甘寧老師】想讀正常書?唔該比錢

生存在世上,最可怕嘅係失去希望。當無力感,絕望充斥住你人生每一個部分,人間對你嚟講已經係一個煉獄之地。

 20160928 4753 a1

我地從小被灌輸要讀好書,尤其係出生基層嘅小朋友,父母相信讀好書就有機會改變命運,脫離貧窮。呢句說話絕對係100%正確的,問題係個「機會」究竟有幾高!

近日有研究顯示,香港8大學生,窮人比例較以往下跌一成,歸根究底問題到底出係邊?點解出自基層嘅人,佢地努力程度絕對唔會比有錢嘅學生差,但前者可能最後將來畢業碌碌無為,打死一份牛工,後者則牛津畢業不得止,仲馬上成為高收入人士?

當然事件會涉及好多因素先會出現到上述差距,而當中最明顯嘅分別在於前者係努力咁用錯誤方法學習!

有錢人自小花大量金錢,放子女入讀國際學校唔係冇原因!單單比較兩者功課量就已經一清二楚,更遑論香港主流學校嘅功課有唔少係不設實際。情況就好似基層子女每日食緊廉價農藥菜,富二代則日日咀嚼來自歐美農場嘅有機生菜,最後容易病嘅自然係基層嘅人。

當然香港仲有一個怪象,總有受害人會幫施暴者說話,呢樣我真係百思不得其解,我可以好肯定,即使最終教育局或學校主動減少大量功課,都會有一班人企出嚟鬧「比咁少功課,我仔女返學究竟學左d咩!」。

另一方面,傳統學校老師會建立權威形象,老師講書,學生唔好插咁多咀,用心聽,我曾經見過,有學生上堂便溺,原因竟然係唔敢舉手打斷課堂!同國際學校相比,雖然主流學校嘅學生紀律性會比較強,但思想會比較不開放,失去主動求知同迎接挑戰嘅心態。

學習打籃球,最快最有效嘅方法就係落場打,而唔係打開Youtube瘋狂重播Kobe單場81分精華片段,同理香港教育有時都會走歪路,例如學英文,即使你搵唔到個外國人同你促膝長談,最起碼都聽下外國人同外國人之間係點交流,而唔係集體訂閱南華早報,我寧願小朋友佢地日日返去睇英文卡通片,相信會來得更有效!原因如下:

1.實用

卡通片角色與角色之間嘅對話係日常都可以用返出嚟,情況就好似你唔會用書面語同朋友傾計,同理你都唔會用得著南華早報果類句子去同外國人傾計,所以你見好多香港學生即使英文好好,但係外國人都會聽到皺曬眉頭。

2.建立學習興趣

唔洗解釋,你放份英文報紙同英文卡通片dvd睇下小朋友會揀邊樣。

總括嚟講,我認免費教育嘅弊處只會埋沒人才,最終結果就會好似依家咁,讀到書嘅人會越來越多有錢人,因為佢地從小課金係教育上,仔女被灌輸正確嘅學習觀,相反基層小朋友只係唔鐘意功課、考試而非唔鐘意「學習」,但社會亦無任何改善傾向,實是可悲。

甚至坊間對教育都開始流出一種可怕嘅說法,有人指出「教育已淪為上層人士打壓基層的工具,試想象一下,減少功課量對老師對家長對所有人都有好處,根本無必要辛苦自己嚟磨滅小朋友嘅學習興趣,所以根本就係上層人士唔希望基層接受到正常同正確嘅學習機會,你想正常就要比錢!」

至於你信不信,我反正是信了!

圖片:Haytham M.