2019-08-25, 週日

【好堅!】北海道實木波波池

話說早前我去北海道玩咗幾日,旅程玩咗乜買咗乜唔係今次想講嘅嘢!今次想講嘅係我回程時喺新千歲機場見到嘅呢個用實木造嘅波波池!當下感覺非常震撼!

眾所周知,一般畀小朋友玩嘅波波池用嘅都係膠波,就好似近期香港大熱、來自台灣嘅親子餐廳嘅藍色海洋波波池都係用膠波。膠波好處係輕、小朋友走入去玩甚至拎上手亂丟,都唔怕整親整傷。

【Holiday Channel】北海道實木波波池

但我今次去北海道見到嘅波波池就一反常態!啲波波竟然係用木造嘅!見到果下無理自己身世(唔係小朋友),就直衝去波波池將木製波波拎上手把玩。發現其手感非常細滑,絕對唔會有木刺。

細心觀察可以睇到每個波波形狀都有點不一致,即係唔係完美圓形,有啲係近橢圓形,而且比一般波波池入面嘅膠波細粒好多。

【Holiday Channel】北海道實木波波池

然後我再嘗試進一步唔理自己身世,直接就成個身坐落去試下會唔會畀木波「un」到好痛。結果發現係唔會嘅!坐落去時,木波波係會順勢「扇走」,唔會痛。感覺都幾得意架!

【Holiday Channel】北海道實木波波池

不過如果小朋友拎上手亂丟的話,就應該會痛喇!同場仲有兩架以全木製造嘅車仔,好Chic呀成件事!

木波波池地址:北海道新千歲機場

×