2019-08-19, 週一

【Teresa Mama】帶BB去Baby Spa要注意的4件事

20190322 10111 01

話說懷孕前見到BB玩babay spa(嬰兒游泳按摩),覺得真係好過癮,直至欣欣出世,媽咪我都好期待呢個畫面,知道其實初生BB都可以玩,不過我就想欣欣再健壯少少先帶佢去,終於依家都5個月大,放心俾佢去玩喇!

 

最期待的畫面出現了,欣欣落水個刻一啲都唔驚,個樣仲好好奇咁樣,起初都驚佢會喊,但佢真係好開心,媽咪我即刻放心哂。

 

個日試玩完,除左係欣欣嘅體驗外,媽媽我亦觀察到做家長不少要注意嘅地方,想BB玩得安全又開心就要知道喇!

 

帶BB做咩活動都好,最緊要安全,嬰兒起好多方面都需要特別護理,去baby spa都不例外,在網上見到有條片有個BB玩baby spa都浸親,真係要提防下。

 

一. 準備安撫玩具

出發前請帶備BB玩開嘅玩具,因為當日所見,有BB大喊,落到水都好驚驚不停喊,當中可能好多成因架,一來怕陌生環境,二來其實游水前有個按摩環節,職員會除BB衫按摩,有時BB見到陌生人又會驚,除左衫衫又唔知咩事,落到水可能又唔鍾意,呢個時候家長唯有用玩開嘅玩具安撫。

 

二. 可自備按摩護膚品

雖然服務收費已包括防水尿片、按摩、沖涼、水泡,家長好似可以咩都唔使帶咁,不過安全起見,大家可以帶BB用開嘅按摩油、護膚品,咁BB可以有個熟識感,而且可以避免引起其他皮膚問題,當然店家使用嘅護膚品都會適合嬰兒使用,家長可自行決定。

 

三. 小心選擇大池與細池

原本為欣欣選左細池,即係單人獨立池,無水流動的,但去到個店員又建議玩大池,即係幾個BB一起玩,最後我決定用番細池,因為就觀察所見,大池係有水流,而且都唔細同埋水深啲,加上欣欣第一次玩,唔想佢落大池太大水流,嚇怕咗佢,以後驚左玩水水就弊了!

 

20190322 10111 02 

 

四. 留意水泡大小

水泡大小是由職員安排,我們都相信其專業,一開始個水泡都睇落好似OK,但玩玩下見到欣欣個下巴滑落左,於是緊係叫職員換番個啱size嘅水泡啦!

所以話呢,就算設施安全,做家長嘅都要睇到實啊!祝大家有個開心快樂嘅baby spa體驗啦!

 

20190322 10111 03

 

作者:Teresa Mama

           一年內結婚生B完成人生大project,但驚覺才是人生新開始的在職媽媽

×