2019-08-25, 週日

【三歲就做到】可以比小朋友參與嘅簡單家務

香港家庭上至小康之家下至草基家庭,小朋友都過份依賴父母工人,導致越來越多港孩出現!其實幫手做家務目的唔係令小朋友辛苦,而係要佢地明白自己都有負任為家庭出一分力,所以安排家務比佢地最重要就係令佢地肯做肯參與!以下就係一D三歲小朋友都可以幫到手嘅簡單事,不妨叫佢地嘗試下。

20170218 6120 A1

污糟衫放洗衣籃

就算小朋友仲未可以做到自行更衣,最少更換落嚟污糟衫比佢地自己拎去扔落洗衣籃!再大過D可以自行更衣,佢地就可以自己換衫自己處理污糟衫,一步步嚟。

擦拭家俬

抹嘢係一樣簡單動作,抹下枱枱凳凳小朋友絕對做得到!當然唔係叫你比曬全屋家俬佢地抹啦,最緊要比佢地習慣同嘗試,同埋對小朋友講都係遊戲嘅一種,比條毛巾加噴霧佢,實會抹得好開心。

淋花

唔好擔心驚小朋友整濕自己就唔比佢地做,就算係整濕咗搞到自己唔舒服都係佢地成長嘅一環!比個容器佢地自己去裝水淋花(先確保花盆位置唔會太高,以及盡量係唔需要移動花盆下就淋到),佢地絕對會好樂意幫媽媽。

垃圾放垃圾桶

呢一樣就我最鼓勵大家先做嘅!係屋企小朋友D垃圾永遠就咁放係枱面等媽媽收執,出街就嗱嗱聲將D垃圾塞比父母,就係因為太多父母覺得呢個行為太簡單,幫一幫無乜所謂,令到小朋友連呢樣自覺都冇埋。

總括嚟講其實仲有好多嘢都可以比小朋友幫手做返,不過謹記我地目的係令小朋友有返一顆負責任嘅心!可能你安排比佢嘅工作簡單到10秒就完成都好,都唔好因為太簡單就得過且過「唉,都係自己做返」,記住千祈千祈唔好咁諗啊!

圖片:網絡

 

 

×