【唔係卦？！】1蚊一件衫超激喪平

旺角中心係好多學生哥、少女經常出沒之地，無他！因為「旺中」內全部都係專售平價時裝、潮流玩意嘅小店，喺現時絕大部分商場都畀大集團、連鎖店壟斷之下，旺角中心就好似葵涌廣場一樣，係好特別嘅商場例子！

由於太耐冇去，日前走訪之下竟有「仿如隔世」之感，嘩！啲衫咁平嘅喂！全場時裝店舖出售嘅時裝平均都係幾十蚊件我並唔意外！直至我去到呢間店.....

店舖出面個公仔著住呢件粉藍色衫大大張紙寫住$4！$4一件衫？唔係嘛？

$4衫隔離呢件係$19，仲要寫住「秒殺」！

超多人正在揀衫！有師奶、又有少女！抬起我的頭來望一望，好多4蚊紙牌！

呢件先激動！1蚊咋！雖然個款真係麻麻地！質地亦好一般！但1蚊一件新衫！好crazy！

呢件就賣4蚊，咁相比之下我覺得上面1蚊果件仲好啲！

牛仔短褲25蚊，如果我啱著，我應該會買囉！

綠色軍褸今年繼續大熱，呢件應該係全店最貴架喇，但都係45蚊咋！另有黑色選擇。

大部分衣物都係十零廿蚊，真係平過一餐飯！由於太多人揀衫喇，記者只能拍到部分照片，個人認為短裙、短褲仔最抵買，款式又多，廿蚊左右有一條！不過前題係你要啱著囉。1蚊、4蚊果啲都係睇下、「嘩！」完就算啦！