【言傳身教】孩子行為反映家長教育方式

過份在意他人評價

小朋友如果做每件事都希望他人稱讚，或者非常在意大人嘅評語，好有可能係因為大人平時對過度稱讚，令小朋友習慣於每件事要向他人取得評價。如果大人一直無改正，小朋友就會被他人嘅眼神、語言同語氣影響，對於佢將來面對社會時(如：返學)，會有好大影響。

其實家長應該要令佢哋學習嘅，係如何於人群中專注做自己。當下次小朋友期待你嘅認可時，不妨試下將稱讚嘅重點轉移至小朋友嘅解決能力，或者係佢哋嘅進步上面啦。

小朋友做錯唔聽教

如果小朋友做錯事時，對於家長嘅教導經常表現出唔服氣、唔聽教，好有可能係因為父母嘅教育觀點唔一致。父母係對小朋友嘅教育上，應該要私下有一套方針。小朋友唔識分對錯，因此如果父母係小朋友面前有兩套唔同嘅觀點，小朋友有機會會學識「睇面色做人」，採用兩種唔同方式對待父母，久而久之，小朋友就難以學識自我反省、客觀認識自己錯誤。

妒忌心及好勝心強

每個小朋友都有自己嘅個性同特點，所以家長亦應該要接受差異，唔好拎子女同其他小朋友嚟比較，咁會令他們養成「比較」嘅性格。如果好勝心強嘅小朋友，就會好容易產生嫉妒心，而如果性情較柔弱嘅小朋友，便好易因此而產生自卑感。

唔願認錯又講大話

其實小朋友講大話或逃避責任，多數係因為家長對佢犯錯時嘅反應過度。當誠實同認錯換嚟心理嘅負擔，無得到家長嘅幫助，小朋友就會開始養成逃避嘅心態。

小朋友對人無禮貌

小朋友係父母嘅一面鏡，好多時小朋友會模仿大人嘅言行舉止，尤其係待人接物上，父母嘅行為更加係直接影響小朋友。因此如果家長指責小朋友無禮貌時，同時亦可以反思一下自己係唔係某啲時候，做過類似嘅行為？

圖片來源：Freepr