【史高治叔叔】銀行工仲係金飯碗?你估而家咩年代呀!

高薪厚職?都要睇下你係咩職位咁啦,好多銀行RM(Relationship Manager),好聽啲講句咪manager囉,講到尾其實咪又係sales,睇下係sell保險、基金定MPF啫。上頭set咗target,如果你跑唔到,睇下佢問唔問候你?所以,點解你哋成日收到銀行同事cold call,你以為佢哋食飽飯無嘢做咩?要跑數呀大佬!

 

20190617 10499 k02

可能你會話,點都好過啲保險佬同保險阿姐吖,銀行有薪金喎。Well,如果係好跑得嘅保險經紀,佢點會睇得起你份糧吖,佢哋實會冷笑一下:「喺銀行跑咁多,有屁用咩。」係呀,你都袋咗人哋份糧啦,啲客係信銀行而入嚟買嘢,你仲妄想同銀行拆佣?跑唔到就被人鬧到媽媽聲,跑得多咪有丁屎咁多獎金囉。如果條數拎出去保險公司,百萬圓桌都有得你坐啦!銀行仲有個policy,就係定期要RM轉分行,提防你同啲客太熟,驚死你轉工挖埋啲客仔走。

咁你可能話:「食得鹹魚抵得渴著,你有公司mortgage喎。」係呀,係人都知做銀行有公司mortgage,超低息,仲可以借足100%,即係首期都唔使俾!不過,你以為真係咁著數?

如果你打算用公司mortgage,咁就差不多等於賣身俾公司。你同上司關係比較好都仲好啲,如果很不幸地你同上司關係麻麻地,你就千祈唔好俾佢知你用咗公司mortgage,因為我真係見過有人買樓開心得滯,講晒俾全世界知,之後佢上司就……嘿嘿,搞到阿下屬嗰年啲bonus少到好似無咁。無嘅,你都用緊公司mortgage啦,即係唔可以隨便走啦,咁得啦,bonus都慳番!不過調轉講,對啲fresh grad出嚟入大銀行做嘅人嚟講,人工必定唔高,想大幅度加人工,真係靠轉工先得,咁就話知佢bonus多定少,反正做一陣就走。 

20190617 10499 k01

所謂有辣有唔辣,局外人睇,公司mortgage係銀行從業員嘅恩物,但其實亦都係我哋嘅金剛圈,日日返工都好似俾人揸住半邊……面珠登咁!用咗公司mortgage就最好乖乖地,如果唔係師父一唸緊箍咒架,你隻馬騮就頭痛到爆炸!

 

作者:史高治叔叔
   後生嗰陣,大學一畢業就入咗大銀行商業部做sales,跟一班有名有利嘅客人打交道,有時可以跟埋一齊飲飲食食,花天酒地、燈紅酒綠嘅生活,造就今日呢個身經百戰又識玩識食嘅叔叔。

田叔叔英語閱讀計劃2023-24
田叔叔英語閱讀計劃2023-24
 親子最關注
香港優質教育機構巡禮 2024