【小胖阿七】醫療保險常被忽視的雜費 出院先知大鑊

是咁的,壯男朋友本身唔係阿七個客,佢40歲左右,早10幾年前都幫自己同家人買落唔少保險,當佢一知阿七做保險,就話:「唔好sell我呀,我咩都買齊㗎啦!」咁阿七識朋友又唔係一定要做生意,所以咪一直都係朋友,得閒食餐飯咁。

早兩日壯男朋友call阿七,話想約飲茶,所以就約咗出嚟。

「喂,阿七,好耐無見!」

「係呀,你幾好嗎?」其實唔使問,阿七已經覺得佢過得麻麻地,佢明明細過阿七20年,個眼袋竟然仲深過阿七嗰個。

「唉,真係唔多好,我老媽子之前肺炎入院,一住就5星期。」

「嘩,佢宜家點樣呀?」

「好彩好番,喺屋企休養緊。」

「咁就好,你之前一定好擔心啦,仲要成日走去探佢,唔怪之得你個樣咁攰啦。」

「之前攰都算,宜家我簡直頭痕又肉赤啦!」

「咦,點解呀?」

「我哋送老媽子去私家醫院,醫生一嚟就問有無保險,咁我心諗好彩有買到,咁就可以俾到最好嘅治療阿媽。」

「係呀,你買得好呀。」

「阿七你聽埋先,到5星期後埋單出院,醫院張單係50幾萬呀!即係每個星期都用咗10萬!我個心當堂離一離,不過心諗是但啦,保險公司會幫手。點知填好晒表格,又交晒文件,保險公司剩係claim到30萬咋,其餘20幾萬我要自己俾!」講到20幾萬,佢眼框真係有啲濕濕地,唔難理解嘅,一下子就冇咗20幾萬。

「嗯,睇嚟係關保障項目問題,你阿媽份保單『雜費』嗰項係咪claim爆咗呀?」

「係呀!阿七你真係聰明。」

「唔好玩啦,我做咗保險40幾年啦!」

「早知就一早問你啦,我call咗保險公司好多次,問嚟問去,差啲寫埋投訴信,我先搞清楚件事。」

「醫肺炎,係用藥啦,最貴一定係啲藥啦。」

「係呀,好似用咩特敏福,成8,000蚊一日呀!」

「咁呀,5星期都要28萬啦。」

「唉……」

「『雜費』保障得8萬左右呢?」

「係呀!阿七你即刻知晒咩事!」

「當然知啦,大部份醫療保單中『雜費』一項最容易被人忽略,因為個個都望住手術費、醫生巡房費、麻醉師費等等包幾多,但係好多人無發現當中係無一項叫做『藥費』,甚至係『檢驗費』,用藥同檢查嗰啲點claim?咪就係『雜費』一項囉,偏偏啲客好少留意『雜費』一項。」

「俾你講中晒!點解會咁㗎!好似好大整蠱咁!」

「所以一定要睇保單囉,話時話,你唔問你個agent?」

「唔好提囉,10幾年前全家都跟佢買單,點知佢做咗一排就轉行,人都唔知去咗邊。」

「你唔搵下其他agent幫手睇?」

「又無生意俾人,我都驚俾人sell架。」

「哈,我識你咁多年,都無sell你啦,咪都照答你嘢,朋友幫手睇下有咩問題呀?」

「又好似唔好意思,我真係無生意俾你㗎。」

「得啦,吓吓都講生意,我仲有朋友咩?」

於是,阿七就承諾幫佢睇番晒啲孤兒單,10幾年前嘅保單,佢會記得自己買咗咩?肯定唔會記得啦!你哋都係呀,真係要拎啲舊單出來曬吓太陽,認真review吓,唔好等下次住院後埋單先知大鑊呀。

 

作者:小胖阿七
   本地保險業界先驅,40年前入行的首批從業員,見證無數高低起落,由高峰期的月入20萬的中環人,到突然要由零開始call單儲客,唔介意分享經驗,最緊要你哋聽完有錢落袋。

田叔叔英語閱讀計劃2023-24
田叔叔英語閱讀計劃2023-24
 親子最關注
香港優質教育機構巡禮 2024