【史高治叔叔】考考你:邊啲機構有最多現金儲備?

話說上個星期五,史高治請咗假去湊女,因為阿女學校放假,而工人啱啱續約,工人要出一出境先,所以老婆叫我要幫手睇住阿女。點知有個客講話想同我傾一傾生意,我梗係話唔得啦,我要湊女喎,不過個客話第二日就要飛,一飛就一個月,咁呀大佬我真係要湊女吖嘛,個女得五歲咋。

個客知道後,就話:「不如帶埋阿女出嚟,請佢食文華酒店嘅海南雞飯。」

咁呀,我都要問下阿女,否則佢同阿媽打小報告就死得人啦,我就問阿女:「去唔去酒店食好嘢?」幸好小女遺傳史高治識飲識食嘅基因,係個小吃貨呢。

入去酒店之前,我同阿女講:「一陣嗰個海南雞飯係全港最貴嘅海南雞飯,你要慢慢咁品嘗,靜靜地咁食,食完晒先可以講嘢,OK?」
「OK。」
就喺阿女食緊海南雞飯嘅時候,立即同個客傾吓佢嘅情況,睇吓有啲咩可以幫手。
「爸爸,爸爸,點解你同叔叔都唔靜靜地咁食?」
「因為叔叔同爸爸之前已經食過呢個飯,得你第一次食喎,咁所以你要細心品嘗,OK?」
好彩阿女好乖咁慢慢食,到食完嘅時候,我同個客都傾掂晒啲正經嘢。
「你個女真係好乖,成個Lady咁,食得好有儀態,教得好好。」
「過獎啦。」
「小妹妹,好唔好食呀?」
「好食,個碗係熱㗎,出面食嗰啲無咁熱㗎,仲有啲雞好滑。」
「哈哈,你咁識食嘅。」個客轉頭望一望我,再同阿女講:「下次再叫爸爸帶你食。」
嘩!成三百蚊一個海南雞飯喎,個客咁大整蠱,雖然有說「窮養兒,富養女」,不過都唔可以俾過多物質俾小朋友,我只好笑一笑。Anyway,睇住個客走人,就帶阿女去行吓街。行行吓,突然有人叫:「Uncle史高治。」

20190710 10562 k01
咦,係史高治舊同事嘅嗰位公子,早幾年見佢仲讀緊書,今日穿著住筆直西裝。
「Hi Raymond仔,嘩,你咁大個仔啦!喺邊度返工呀?」
「我啱啱畢業,入咗綠色銀行呢。」
「好呀,大行呀,做RM?」
「係呀,都同我想像有啲唔同。」
「點唔同呢?」
「我以前成日收到啲cold call問我借唔借錢,咁諗住入銀行做,都係主力sell loan啦,點知我而家做嘅係啱啱相反。」
「跑saving?」
仲記唔記得史高治一早就問大家知唔知邊個機構hold住好多cash?諗到未?答案出嚟啦。
「係呀,宜家成日同老細見神嘅兒女。」
「咦,主要見宗教團體?」
「係呀,香港大大小小好多教會,仲有佛堂,真係估唔到佢哋hold住咁多cash,講緊係億億聲㗎!」
「唔奇呀,你有無返教會?」
「無呀。」
「無都唔緊要,不過都知道一般教徒會有十一奉獻,仲有大大小小嘅捐獻,你可以想像到每月都有不斷嘅現金流,點會唔多錢?」
「就係咁啦。」
「都好呀,我估宗教人士都較簡單,人品應該都唔錯,仲要唔驚啲錢係黑嘅。」
「都係㗎,見啲客都幾溫文儒雅,唔會好mean,又唔會好aggressive,都幾令我大開眼界,不過我都要向老細學習吓,睇吓點樣同宗教人士傾偈,譬如有時老細會講到幾句經文,仲表現得好理解佢哋諗咩咁。」
「呢啲都係需要累積經驗,當你見得人多,就會慢慢學識㗎啦,所以做人要open啲,出去見多啲世面,同多啲人傾偈,無論係咩背景嘅人,都要嘗試溝通,站喺對方立場去諗,減少盲點,鬼佬都有句話『put oneself in other’s shoes』。」
「Uncle你講得啱呀,我會虛心學習,我都差唔多要返office,下次再傾,拜拜。」

史高治都自認係uncle,不過突然有個廿歲仔叫史高治做uncle,好似突然仲老多啲!不過,史高治知道最緊要係保持年輕嘅心,要可以同年輕人好似friend咁傾到偈,千祈唔好高高在上咁教訓年輕人,否則只會淪為脫節嘅老海鮮,令人避之則吉,之後孤獨終老。

每個年紀、位置嘅人都有唔同挑戰,不過一直唔變嘅就係一定要用心聽唔同人講,先可以保持到良好關係,做得成生意。如果有一日,發現只係得返同一圈子或年齡層嘅朋友,就要反思吓個心係咪已經老到無朋友!史高治一直提醒自己,因為真係唔想將來同阿女交唔到心、傾唔到偈。

 

作者:史高治叔叔
   後生嗰陣,大學一畢業就入咗大銀行商業部做Sales,跟一班有名有利嘅客人打交道,有時可以跟埋一齊飲飲食食,花天酒地、燈紅酒綠嘅生活,造就今日呢個身經百戰又識玩識食嘅嘅叔叔。不過自從做咗老竇之後,史高治叔叔修心養性,決定將行內鮮為人知嘅見聞,喺專欄裡面一一公開。

田叔叔英語閱讀計劃2023-24
田叔叔英語閱讀計劃2023-24
 親子最關注
香港優質教育機構巡禮 2024