【珍寶豬欄】小朋友,你願意一齊努力嗎?

喺去診所期間,我就喺度諗如果要開刀拎石嘅話,究竟做唔做好?佢雖然年紀唔大,但係佢身體機能上本身就係有缺陷,捱唔捱到亦唔知,當時我真係好苦惱。去到醫生度,醫生手勢純熟快速放尿,啲尿足足整濕晒一大塊尿墊…我望住被接近揸乾尿袋嘅波波雞,鬆咗一口氣,同時我心諗『頂呀!喺屋企又放唔到,又鬼殺咁嘈,嚟到診所一見醫生就放到』。


醫生表示而家並無急切性嘅問題,既然放得到尿就可以再觀察多排先,不過我見反正都嚟到,我又好擔心會唔會係有石令到佢放尿時覺得痛,所以都拜託醫生幫手做驗尿石檢查。結果,醫生第二日打嚟話的確係有好多晶石,醫生亦需要驗多次波波雞嘅小便,話係拎去種菌睇睇。


種菌報告未出到,呢幾日放尿亦好順利,表面上波波雞就係一隻好健康好食得屙得嘅貓。望住佢周圍撩交打,我個腦一直喺度諗『究竟可以點做,係咪我做得未夠好先咁』,諗吓諗吓,我又好似返到去原點,返到去初初收養波波雞嗰陣。小朋友,你願意同肥婆媽媽一齊努力嗎?我唔放棄你嘅話,你可唔可以唔好咁快放棄自己?就好似當初一樣~

【珍寶豬欄】 

(以上專欄由Dr-Max教材大王全力支持)

田叔叔英語閱讀計劃2023-24
田叔叔英語閱讀計劃2023-24
 親子最關注
香港優質教育機構巡禮 2024