【珍寶豬欄】呢啲嘢請你返屋企做

7666
一位姨姨入到嚟,望兩望,自己搵個靚位坐低咗~
佢摷摷手袋,拎出個指甲鉗...


阿姨,你唔係諗住喺度剪手指甲嘛?

佢望望四周嘅人,施施然脫咗隻左鞋...露出赤裸裸的腳~

人嚟!拖佢出去斬!剪手指甲都夠難頂,你仲要玩腳甲?

我企圖阻止:「小姐,你唔可以喺度咁做呀,請你返屋企先剪啦」
佢:「剪幾隻咋,好快!」
我:「唔係快唔快問題呀,係衛生問題啊」
佢:「有幾唔衛生呀?腳甲咋嘛,你都有㗎!」
我:「呢啲個人衛生請你返屋企做啦~」
佢:「我腳甲太長,著鞋頂住呀!唔舒服呀!好快!」
我:「你咁樣會影響到其他人㗎~請你返屋企先剪啦」

佢:「好快咋,你唔出聲我就快快剪咗佢啦」

我出聲嘅話,你會有幾慢剪呀?將塊腳甲度凌遲處死咁剪呀?定將佢磨粉沖水飲呀?

我:「小姐,你呢啲嘢請你返屋企做~」

佢:「咩呀?你嫌我冇俾生意你呀?」
知自己運吉仲可以咁大聲夾惡,你都真係有型啦!
我:「就算你係病人,我都會叫你返屋企先剪呀~你咁樣影響到其他人呀」

佢望望其他人:「佢哋都冇出聲!邊個話我影響呀?」
有位叔叔喺佢側邊撩鼻屎,撩完再拎出嚟彈手指。
阿姨見到:「喂!你有冇搞錯呀?喺度咁樣!」
叔叔唔理佢,繼續撩。
阿姨:「幾十歲人你咁樣唔衛生呀!喂!好停啦喎!」
叔叔開聲:「有咩咁唔衛生呀?鼻屎你夠有囉!你冇鼻屎呀?」
姨姨立即著返隻鞋,衝出診所。

叔叔笑了。

田叔叔英語閱讀計劃2023-24
田叔叔英語閱讀計劃2023-24
 親子最關注
香港優質教育機構巡禮 2024