2020-11-25, 週三

【新年煎糕好煮意】工人姐姐咁樣切年糕

講到煎年糕,無論個糕本身係圓形或是長方形,我都係同大部分人一樣,會將個糕切成塊狀咁拎去煎。

另一個切法就係切成條狀,雖然比較少見,但亦都見過有人將年糕或蘿蔔糕切成條狀,相信係因為方便進食。不過將個年糕當蛋糕咁切到個三角形我都係第一次見,真係好好笑。

【親子趣聞】工人姐姐咁樣切年糕

事情係咁嘅,話說早兩日Whatsapp就瘋傳一幅年糕相,內容指:「叫新姐姐煎幾件年糕做tea,聲稱喺前僱主到煎過,放心無睇實,結果變成咁,我家得2大2小咋」

憑兩個「嬲嬲Icon」睇,事主應該係嬲咗嘅,因為成底年糕咁切法仲煎曬咁滯,一家四口(2大2小)一次過幾難食得曬!

不過呢切蛋糕嘅方法應用喺年糕度真係好好笑,雖然切得好大舊,但都有加蛋同埋煎得都幾靚,放入圓形玻璃碟咁上檯好好睇!工人姐姐嘅創意同娛樂度滿分!