2019-10-16, 週三

【燉洋蔥止咳殺菌】小童、孕婦、人奶媽都食得

呢排天氣轉涼,由上星期開始已經喉嚨痕痕有少少乾咳,再加上聖誕假出咗兩日街,搞到冷親,半夜咳都甩肺。

自己咳自己辛苦唔緊要,最擔心係將病菌傳染比小兒。但由於媽媽我仲餵緊人奶,所以又唔想睇醫生食藥(我知,只要同醫生講餵奶,佢會開啲溫和嘅藥,可以唔影響餵奶嘛!)唉,我都餵咗成年人奶又點會唔知呢?之但係,我試過幾次咳去睇醫生,食咗幾次「溫和藥」都唔好。醫生都話無辦法呀,唔可以開啲勁藥畀我,係要等自己慢慢好,咁所以我寧願唔睇啦!

【親子飲食】小童、孕婦、人奶媽都食得
圖片:互聯網

直至我知道咗燉洋蔥呢個方法之後,簡直覺得洋蔥太偉大喇!止咳真係一流,簡單易整、成本又低,而且好好味!個人覺得好味過燉橙10倍!但如果你本身唔鍾意洋蔥味就無辦法啦!

【親子飲食】小童、孕婦、人奶媽都食得

點整?好易,先將洋葱去皮、切開,隔水燉20至30分鐘,視乎你個洋蔥有幾大個啦,大個就燉耐少少!

燉好之後碗入面嘅洋蔥會流出洋葱汁,洋蔥汁會吸晒入碟仔入面,我就將洋蔥水畀我一歲嘅小兒飲,可以止咳,無咳就當保健殺下菌咁。因為味道係甜甜哋嘅,所以佢都好鍾意飲唔抗拒。我呢幾日咳到甩肺就自己飲晒啲洋葱汁之餘仲成個洋蔥食埋,食咗兩次之後就無咳喇!堅有用架!

【親子飲食】小童、孕婦、人奶媽都食得

燉好之後係咁嘅,洋蔥上面一粒粒果啲係粉紅岩鹽,燉後加入去嘅,好味喎!

上網睇過資料話洋葱功效同葱、蒜類相似,都係有殺菌作用,對於寒咳有一定幫助。

我之前都介紹咗呢個方法畀我個咳到死死下嘅孕婦朋友試,佢都話真係得。當然,如果擔心自己唔適合食洋葱就問下醫生先試囉!始終每個人嘅體質都唔同架嘛!