【子宮內膜異位檢查】用埋資助抵唔抵試?小編誠實試後感

 20180710 9035 B01

事情由上次收到確認信開始講起,小編當日即時就打咗去安排嘅診所處預約。參與呢類優惠,最怕就係佢講就話有資助,實際規則一堆,計計埋埋可能埋單仲貴過出面睇…

所以小編打去後大概約咗日子後,就問咗幾次點收費同優惠用法:

當時姑娘就答我:「正常包埋診金,收費係$450啦,但如果另外開藥嘅話就到時另計收費。」

小編:「咁用埋個資助,係唔係可以可以扣哂檢查同診金嘅費用?」

姑娘:「資助?你到時帶埋過嚟啦。」

小編:「哦…咁其實係唔係:無資助嘅話,總收費就係$450、有資助就再扣除?」

姑娘:「係呀,到時要開藥嘅話先另外再收費。」

小編:「除此之外無其他收費㗎啦呵?」

姑娘:「無。」

於是小編準時赴約。

 20180710 9035 B02

去前記得一定要印埋電郵封信,到時姑娘會收。

20180710 9035 B03

間診所位於荃灣,係幢大樓入面,環境都幾大幾舒適,登記時見佢櫃台貼咗張公告係關於收費調整嘅紙仔,於是我再向姑娘確認一次收費。點知姑娘就話,佢哋做法係扣診金,而診金就係$500,而超聲波係$400蚊…啫係普通WALK IN的話,收費係$900…同電話講嘅有出入。好彩畀$400個價錢都尚可接受…加上小編又真係有需要照,所以最後都決定檢查。

 

除咗收費溝通上有所保留外,其實診所服務同環境都唔錯,姑娘都好溫柔。不過因為超聲波要照小腹,幫小編檢查個醫生係男人,呢樣就有些少尷尬…不過好彩一啲比較尷尬嘅時刻,護士姐姐都會幫手遮掩吓。

成個過程都好簡單,小編入到去時,醫生就問咗啲關於我經痛嘅情況,再了解吓有無藥物過敏等等…跟住就去照超聲波,照完後醫生又會同你講解返你嘅狀況,同埋講解一下有咩處理方法。

 

其實小編自中學時期開始,就有經痛問題,隨住年紀越來越大,就越嚟越痛…除咗試過當街暈底、企唔到、飆冷汗等等情況,最厲害時期試過痛到喺屋企地下碌、1個鐘食咗6粒止痛藥先無咁痛。之前睇家庭醫生,有醫生就話係因為子宮前傾、又有醫生話生完仔就會好返。但今次照超聲波,醫生就話子宮前傾好多人都有,而我都有呢個狀況,但一般都唔太關經痛事,反而子宮後傾就可能係子宮出現一啲狀況而產生,因而導致經痛。而生完仔,經痛就會好返呢個問題呢,醫生就話睇人啦,佢有病人生完仲痛咗…

 

咁小編照完,醫生就話睇唔到有咩問題,唯一解釋就係我可能係經期間,體內荷爾蒙(雌激素和黃體素)分泌過多,導致我經痛。唯一方法就係食止痛藥,止唔住就食強效啲嘅…如果最後真真真真係無辦法,最後先考慮食避孕藥調經…不過呢個方法會有啲後遺症,要諗諗先。

 

田叔叔英語閱讀計劃2023-24
田叔叔英語閱讀計劃2023-24
 親子最關注
香港優質教育機構巡禮 2024