2020-01-22, 週三

【珍寶豬欄】渴望大自然賜大家一個颱風?

【珍寶豬欄】渴望大自然賜大家一個颱風?

 

香港人工時長,假期少,所以渴望大自然賜大家一個颱風,令大家都有得額外多一日假。不過呢部份人應該代表唔晒全部香港人,有好多人喺打風期間都仍然要堅守崗位…

每逢打風時,就會見到好多人講『個風越大越好!唔駛返工最好!最好有全日假,最好吹冧埋我公司!』,你安坐家中開住冷氣梗係爽啦,出面橫風橫雨都唔關你事啦。雖然見到呢啲人咁講嘢會覺得好抆,但係同佢拗嚟其實一樣好無謂,你會唔會浪費時間同個傻嘅拗?

20180917 9286 B01
喺打風期間,最無助嘅都係喺出面流浪嘅動物,人有臨時庇護中心,但動物呢?呢啲日子仲係生仔高峰期,雖然好多人都話流浪動物匿開就識搵地方避風,但係湊住堆B嘅媽媽,好多時都顧唔到咁多。特別係村入面,好多時大雨後會發現有啲BB俾雨水沖咗出嚟,好命嘅俾人發現到執身彩,唔好命嘅大概已經成為食物…自然界嘅弱肉強食就係咁。作為人類,我哋都未必可以幫到全部,遇到需要幫嘅動物時唯有盡幫。


雖然有一邊嘅人好渴望打風打到吹冧埋公司,但係同樣有另一邊嘅人唔希望打風打到吹冧流浪動物嘅暫避處。就好似有人會將一卷膠紙抬高價格至八十蚊,亦有人會五蚊一卷咁賣俾人。我都唔知有啲人算唔算係識做生意識賺錢啦,我淨係知香港地咩都炒係大家縱出嚟…香港有啲打工嘅咁渴望打風死人冧樓,都可能係因為工作壓力太大卦。