2020-07-07, 週二

【甘寧老師】我個仔要做CEO

嚟緊K3嘅小朋友就升讀小一啦,係咁多位家長擔心緊自己仔女升小之後應唔應付得掂之時,已經輸了!因為人地已經鋪緊路做CEO。

 20160714 4011 a1

今日係街上無聊閒逛,比我發現到一個可以改善我仔女一世嘅Banner,「未來CEO成長訓練營」!啊仔機會嚟啦。

20160714 4011 a02

雖然我都明白活動內容其實可能係好正常、好普通,只係佢地玩下「標題黨」吸引下人。我唔係唔鍾意佢個標題,而係唔鍾意個機構甚至社會覺得我地家長係會被呢d標題所吸引!你改個咁嘅標題係咪串我地一定要個仔搵大錢做CEO先,呢頭話我地怪獸家長果頭SET個陷阱比我,算點。

唔知由幾時開始,社會就一直鼓吹錢就係一切。到底係我地家長嘅行為令佢地覺得我地係咁諗,定係傳媒、機構或社會共同制造同渲染呢種價值觀!你以為我會反對這種價值觀?非也,我想講嘅係有時人要虛偽d,凡事都太現實,社會會變得冷漠、人與人之間會變得功利,就好似依家香港咁。

「喂,啊俊好耐無見啦喎,近排點啊!」

Peter仔?咁好死無啦啦打比我?」

「哦,我近排去左間新保險公......」

嘟嘟嘟.........

其實錢係重要,職位都有分貴賤!貴賤之別來自我地嘅偏見,試幻想一下如果個活動叫做「未來地盤佬成長訓練營」,你又會唔會望?(地盤佬都可以搵大錢、有前途,唔好狗眼看人低)

有時候人係需要大話嚟安慰自己,失戀會相信下個會更好;衰人無報應我地會相信係時候未到,呢d大話有助我地正面前進,跨過現時挫敗,面對未來挑戰!

以前部分家長即使係心入面都想仔女將來賺大錢,但佢地都仲會呃自己,「錢唔係最重要,最緊要個仔開心」,「讀唔到書唔緊要,最緊要搵到自己興趣」。但依家連家長都變得越來越現實,竟然連大話都廢事講,係咪一件好可悲嘅事!

「媽咪我想做運動員!」

「做運動員搵唔到食o架,做CEO啦!」