2019-11-14, 週四

【甘寧老師】教育局三戰家長底線

東漢末年有我哋劉備放下身段,三顧茅廬感動諸葛亮出山,今有教育局三戰家長,激起民憤!局長更完美展現職業生涯磨練到登峰造極嘅「亂嗡」技能,印像中佢每次「亂嗡」完都家有囍事,我真係恭喜你啊!

第一戰:強推小三復考TSA 扭曲民意

20161222 5582 A1

自從有咗TSA之後,小朋友嘅功課更多更難,題型仲貼近TSA一樣咁千奇百趣!個個都話無針對TSA操練,但實際只係玩文字遊戲,改頭換面去包裝課後補課,TSA題目就融入日常家課。嗯......又真係冇操練嘅!

至於TSA有咩問題,口臭都要再講多次,就係完全唔清晰得嚟嘅數據會點運用!如果真係做到原意咁,用得嚟數據幫助改善全港學校教與學,咁點解釋學校會咁緊張去加操?雖然教育局從未講過TSA成績同學校Banding有關係,但種種跡象實在令人難以信服。

第二戰:扭曲民意 落井下石

係家長反對聲音一浪接一浪嘅攻勢之下,局長終於肯同家長聯盟會面,整個會面過程佢地立場都堅定不移咁反對全面復考小三TSA,但報導出到嚟唔單止隻字不提家長反對聲音,仲唔知係邊到彈咗個「18區家教會聯會」出嚟代表全港家長支持復考。

20161222 5582 A2

事後局長不單止冇為騎劫民意道一句歉,仲係會議中落井下石整句「家長唔滿意TSA大可唔操練同轉校!」,根據局長精密嘅邏輯,我地香港市民「買唔到樓大可以唔住」;打工仔「唔想加班大可以辭職」!原來我哋個社會一D問題都冇。

仲亂嗡?成個香港教育界都比你「彎」曬啦。

第三戰:初中擬增15小時基本法課程

20161222 5582 A3

嗱嗱嗱,呢樣就玩得太過份啦!基本法嘅嘢你地係識嘅就唔洗成日去「人大釋法」啦,你地班大人自己都未識就咪搞班o靚仔啦,雖然三年讀15粒鍾好似好少時間,但係又冇用又疑似係另類「國民教育」嘅嘢,重要係全港市民都對教育局失去信心嘅情況下先嚟搞呢味嘢!我怕下次發起大型遊行示威嘅唔係一班廢青,而係一班莘莘學子嘅家長。

圖片:網絡