2019-10-17, 週四

【史高治叔叔】當冇人再講道義 估唔到補習社聽到

 

20190730 10632 C 00

早幾日翻睇經典台,1989年吳宇森嘅傑作《喋血雙雄》入面有句對白:「江湖變啦,無人會講道義」,唔經唔覺套戲都30年,你話今時今日仲有無人講「道義」呢兩個字?

20190730 10632 k01

史高治最近參加咗燈塔補習社嘅30周年聚餐,今年亦係佢哋上市一周年,喺九展擺酒,得悉唔少朋友會帶埋小朋友嚟,咁史高治都帶埋阿囡過嚟,等佢同班小朋友一齊玩吓。

史高治嗰個年代都唔太興補習,我對呢啲補習社嘅印象有限,最深刻係揸車嗰時見到巴士車尾大大個廣告,大show啲打扮到型一型嘅明星補習老師。一望,就覺得浮誇,難免都會覺得呢一類補習社一身銅臭味。不過,經過呢場宴會,史高治有少少改觀,因為呢場宴會又無想像中咁商業,相反仲幾有親和力。

宴會一開始,竟然唔係主席演說,而係俾一個曾經喺燈塔補習社補過習嘅學生分享,即刻覺得佢哋都算重視學生,大家一定諗:「梗係啦,學生係米飯班主嘛。」No啦,納稅人夠係政府米飯班主啦,又唔見得好重視呀。

咦,第二個出嚟講嘢嘅又唔係主席喎,係陳葒校長!係「陳校長免費補習天地」嘅陳校長呀,專幫基層貧窮小朋友!一間係非牟利慈善機構,同一間係出名賺到錢嘅補習社,咁都friend得到?唔通史高治有啲睇漏咗?

史高治帶住個疑問食咗半餐飯,主席終於出嚟講嘢啦!佢個名唔重要,但史高治好想寫出嚟,佢叫June,寫出嚟嘅原因係好想標示佢係一位女士。June之後講嘅說話係幾令史高治另眼相看。

June講佢曾經收過一個電話,係另一間補習社嘅補習天王call佢,電話內容大約如下:

「我同老闆唔太啱,我有10,000個學生,我想同你哋傾轉過嚟。」

June憶起自己當下靜咗30秒,佢腦袋有好多諗法,包括計緊條數:10,000個學生,當每個學生俾1,000蚊學費,都等於1,000萬!仲有諗緊自己間補習社嘅Market Share係排第3,同第2名嗰間都相差好多!呢位天王仲要自己送上門!但係佢突然諗到,如果呢位天王真係過檔,原本嗰間補習社肯定就要執笠,咁就好多人失業。佢形容,個心真係好似有個天使同阿魔鬼喺度鬥爭緊。

30秒後,June堅決拒絕咗呢位天王,輪到平日口齒伶俐嘅天王呆咗30秒。

「佢梗係呆咗啦,佢一定估我唔到。其實,真係唔止1,000萬,係起碼飛走咗1億!但係,我一啲都無後悔,因為呢個係道義!」

史高治一聽June講「道義」兩個字,係一個斯文女士講,真係覺得稀奇,其實都唔係關男定女問題,而係史高治真係覺得「道義」兩個字喺電影通常都出自男人口,而家由一個女人仔講,估唔到有威力。

好一句「道義」,一億生意都無令佢動搖,史高治俾個「服」字佢!所謂一間好公司,應該要賺到錢之餘,仲要得到行內行外尊重,係人都知補習社賺到錢,至於受唔受人尊重呢?大家應該就覺得一般般,始終形象都係好功利,不過喺呢一刻,史高治就有少少改觀。

後嚟見到燈塔補習社一名師「歪歪」,佢係幾高大,穿著得幾醒目嘅,突然諗起早幾年,有間補習社登全版廣告,以年薪8,500萬利誘「歪歪」過檔,而「歪歪」就拒絕咗,而家開始明白點解,如果主席係講「道義」,自然會有下屬支持。就算呢一行幾咁功利都好,原來都有人守住道義嘅。

其實係史高治讀書年代,都好少人去補習,不過今時今日補習社成行成市,所以史高治都應該要好好了解一下,知道而家咩世界。當然,阿囡仲係好細,都未知會點發展,將來又唔係話一定要補習,不過史高治都好想教佢「道義」兩個字,唔想好似電影所講:「江湖變啦,無人會講道義」咁涼薄,我信無論咩年代,「道義」係有存在價值,否則個世界會變得好醜惡!

作者:史高治叔叔
   後生嗰陣,大學一畢業就入咗大銀行商業部做Sales,跟一班有名有利嘅客人打交道,有時可以跟埋一齊飲飲食食,花天酒地、燈紅酒綠嘅生活,造就今日呢個身經百戰又識玩識食嘅嘅叔叔。不過自從做咗老竇之後,史高治叔叔修心養性,決定將行內鮮為人知嘅見聞,喺專欄裡面一一公開。