2019-09-19, 週四

【網絡熱話】咁大個人就唔好坐BB車?

而家網絡真是太發達,隨意在網上就發表言論,造成網絡公審是十分容易的事,早排又睇到群組,有位家長話見到「大嬰兒」坐BB車,又用飲管飲水唔好,仲講到要救救孩子,其實係咪真係有咁誇張?

 【親子頭條】咁大個人就唔好坐bb車?

老實說,自己有時見到牛高馬大的孩子坐BB車都覺得不太好看,但就認為別人的教養方式有自己一套又或者另有苦衷,根本不用執於眼前所見的事。然而,這位在網上發表言論的家長,卻好像在說一件很嚴重的事,又要救救孩子,內容是:

「早前有政府電視廣告,宣傳的是要讓小朋友自覽進食

恐怕日後會有同樣廣告,宣傳要小朋友自己行路和飲水:

今朝搭馬鐵,見有 “大男嬰“ 在嬰兒車上,要飲水,是媽媽拿著有飲管的水樽, “大男嬰“ 用飲管飲水。

唉,救救孩子!!」

雖然他就像認為事態嚴重,可是回應的家長卻大部份都認為別人這樣做可能有其苦衷,亦有家長回應指因為種種原因,本身不願讓3歲孩子坐BB車,只是別無他法才這樣做。

其實,家家有本難唸的經,每人背後都可能有其不為人知的故事,又何必事事站在道德高地,有時多體諒人,或者自己心情也會有好的改變。

部份家長回應:

1.  Bb車其實係可圈可點。

好似以我為例,我自己坐唔夠10次bb車,我仔3歲,冇坐過bb車,我連bb車都冇買,可以手抱就手抱 可以俾佢行既我會俾佢行。有啲家長可能因為有bb而唔能夠揹/抱;有啲可能係雙胞胎,bb車的確係會方便佢地

每位父母都有自己苦衷,亦有自己照顧小朋友方法

2. 有時唔好單係睇表面,好多家長都有不得而的苦衷?

只要不影響人就可以!

3. 如小朋友嚴重發展遲緩,幾歲大仲需要bb車,外表未必睇得出,好難單靠表面來斷定家長過份呵護或小朋友係港孩!

4. 其實好多大BB已經被訓練成很懶很懶的了。見到啲婆婆,寧願推住BB車帶孩子,也不想拖著行,有啲真係有苦衷的,體力不夠是其一,怕孩子在路上大吵大鬧,是其二。驚孩子一下子走開怕出意外,是重點。
婆婆體能,又怎及精力充沛的小精靈,有好多事係冇人想架。
我哋只是做旁觀者,又豈可隨便作出批評?
其實有不少年輕的母親,也有其苦衷,她們要送孩子上學,放下孩子之後,好多是馬不停蹄,立即去上班,一來母親不想讓一個滿身汗臭的小孩,交給學校,另一方面,做媽媽的,也想穿得較為得體的上班。推BB車對他們來說,其實他們是知道不應該的。
我們嘗試用另一種角度去了解過問題,自會明白的了。

5. 我以前做醫務所時…見到有個媽媽推住架普通士的bb車載個7、8歲既仔睇醫生。仲要求我同事行出診所外幫佢探熱……當時我未係媽媽……冇諗其他,只係覺得冇需要咁寵個小朋友掛……直至佢入到醫生房我入去跟症……先發現小朋友對腳係向內嚴重扭曲,果刻我覺得自己睇得太表面太膚淺....
依家我小朋友都7歲……佢病得好辛苦我都會用BB車推佢去睇醫生,佢已經病到冇力,一身都軟……無謂令佢更加辛苦。有時都可能係有苦衷,迫不得已先咁大個仲會坐車既。

6. 其實我唔排除樓主所講嗰位真的是港孩/過度保護, 感恩許多人留言都能指出唔同人有唔同需要, 唔想樓主只用一個"可能確實是過渡保護的個案"去摡括所有情況, 以致出現標籤作用, 令處在困境的兒童或家長加重受傷。
而言樓主睇左咁多留言卻沒有一句回應, 令人有點失望。
不過也向樓主道個歉, 我們並沒有見到他所見的個案卻一味的否定他。
相信只要不就表面情況去作判官, 考慮下人地的情況, 生活一定會輕鬆點。

7. 除左子女健康問題要用BB車外,我想講我都係一定要用BB車既媽媽,我一直都有腕管綜合症,母指腱鞘炎,頸椎變形同肩周炎,懷孕期間痛得更厲害,落街買野時連銀包都拎唔到,我大女係9磅巨B,老實講我無可能抱到佢,由佢4個月大開始我差唔多無抱過佢,我連揹帶都無買,只買了兩架BB車,我自己都好唔開心,見到人人都可以抱自己孩子,要知道抱著自己孩子都係一種福氣。到佢歲幾兩歲識行,我懷有細仔8個月,有次落街食飯諗住禁近唔帶BB車,到比錢時個女跑去扶手電梯,我即係起步追,點知跌到,當時好痛,即刻去左醫院檢查,好驚8個月小產!好彩後來平安無事。到生埋細仔,我開始膝頭痛,幾級樓梯都行唔到,成日搭電梯比人眼望望,又唔可以拖細仔(3歲)行,因為比佢拉扯我膝頭就痛,一拉扯我就變成行平路都成問題呀!唔用BB車我係唔可以自己同細仔出街的!人地睇我表面無咩問題,就覺奇怪我點解搭?又推車,唔通每次出街都要係個身度寫住骨痛病者解釋咩?

 

×