2019-11-16, 週六

小胖阿七

  • 10845

    最近,阿七去開旺角,就同個喺附近開格仔舖嘅朋友食晏。

    20191003 10845 k01

    大熱天時,咪同侍應落單:「凍檸茶,少甜少冰。」
    「凍飲加三蚊喎。」
    「ok。」
    點完餐啦,但個朋友仲將個餐牌翻來翻去,唔知睇咩呢?隔咗一陣,朋友終於開聲:「佢應該喺餐牌寫返『凍飲加三蚊』。」
    「佢口講咗都ok啦。」
    「小心駛得萬年船呀,你都唔知有啲客幾X街。」
    「唔會真係有人嘈卦?」
    「我見過。」
    「吓?」
    「係呀,咪就係因為餐牌無寫,個侍應一時又唔記得講,到埋單時,個客就嘈。」
    「三蚊啫。」
    「個客話要報海關,用『商品說明條例』嚟告佢。」
    「吓,使唔使咁誇呀,三蚊就豪俾佢囉。」
    「係呀,人哋打開門做生意,個老細都怕咗佢,咪唔收佢嗰三蚊囉。」
    「咁唯有小心啲,寫返清楚。」
    「寫清楚都啱嘅,不過個老細最嬲就係咁小嘅事,就搵海關、『商品說明條例』嚟嚇佢。」
    「咁又係呀,我就做唔出啦,宜家啲租咁鬼貴,小店好難生存架!」
    「個個好似阿七你咁諗就好,我都遇過啲麻煩客。我開嗰間格仔舖,有一格就放咗啲小盆栽,賣80蚊一個,我上架嗰陣一時唔小心就標咗『8』蚊,有個阿媽同小朋友一齊入嚟,個阿媽就幫小朋友買小盆栽用嚟做功課。佢買嗰時,我一望,就知道自己標錯價,即刻好唔好意思咁同佢道歉,解釋係我搞錯咗。如果阿七你係個阿媽,你會點呀?」
    「咁咪走人囉。」
    「都話你人好架啦,祝你好心有好報呀。不過嗰個阿媽無放過我,佢話佢見到係八蚊,仲影咗相,仲好惡咁兇我,話如果我唔八蚊賣俾佢,佢就報海關,用『商品說明條例』嚟告我喎。」
    「都未必告得入啦,我覺得你唔係有心誤導,同埋又唔係迫個客俾80蚊,可以唔交易架嘛。」
    「我都知,但係嗰吓我心諗,一陣佢真係癲起上嚟去搵海關,海關一陣嚟查,都阻到我做生意,仲俾人以為我犯法。一陣唔好彩要上庭,咪又要問律師意見,搵律師都要錢,平極都要幾千啦。個客就一啲成本都無,我個成本就重到嘔。最後我就八蚊賣俾佢,當自己唔好彩啦,咪自己嘔番幾廿蚊出嚟囉,佢擺明就睇死我打開門口做生意唔想煩。」

    「不過,佢無形嘅成本都重架,帶住個小朋友都唔好好去身教,應該教小朋友多啲體諒人哋嘅難處,第日個小朋友好自私同隨便去佔人便宜,個阿媽將來都要承受返呢個惡果。」

    「不過,講開又講,我覺得海關都唔會幫商戶,海關梗係想捉人立功啦。」

    「嗯,立法原意係好嘅,因為睇新聞,真係拉咗嗰啲迫人買咗幾十萬健身會籍嘅公司,又真係捉啲賣假貨嘅人,我覺得海關都係想破大案,對你嗰八十蚊應該無乜興趣。所以,你上次應該唔驚嘅。」

    「都係嘅。不過,對啲無咩錢、唔識嘢、怕事嘅人嚟講,只不過犯咗個無心之失,但一聽嗰個客話要告你喎,成個心都怯埋啦。嗱,我認自己無錢唔識嘢同怕事,都係嗰句,打開門口做生意。」

    有時話咩法律面前人人平等,但係對於有錢人嚟講,咩都可以請律師,容易走到法律罅,但係星斗小市民?無錢就慘啦,無律師保護,就無相關知識去保障自己嘅權益,仲會好易俾人嚇埋。呢個係好無奈嘅事實,惟有小心啲,學識去保護自己。同埋,都係要教好自己嘅小朋友,去感染身邊人,如果更加多善良嘅人,呢個世界就會更美好。

     

    作者:小胖阿七
       本地保險業界先驅,40年前入行的首批從業員,見證無數高低起落,由高峰期的月入20萬的中環人,到突然要由零開始call單儲客,唔介意分享經驗,最緊要你哋聽完有錢落袋。

  • 10710

    阿七從來無返過大陸揸車,因為唔熟悉大陸路面情況,覺得有啲危險,所以一直都冇去了解中港牌嘅申請同保險事宜。直到有朋友今年想幫架車申請中港車牌,方便帶小朋友同屋企人過境探親旅遊,然後佢好勞氣咁呻,阿七先知有啲咁唔合理嘅事。

    20190826 10710 k02

    話說,如果要申請中港牌,就一定要送架車去驗,原來只可以選擇位處元朗(!)嘅一間檢驗公司,因為佢係內地喺香港唯一一間指定驗車中心,大家明啦,即係你要中港牌,就一定要幫襯佢。獨家獨市喎,可以想像服務有幾好。

    朋友話:「我今年第一次去,終於見識到啦!之前有個朋友揸架搵食車,年年都要去驗車,佢話去咗5次,5次都見到啲人同職員鬧交,你知唔知點解?」

    阿七都未答,朋友已經忍唔住繼續爆:「因為啲職員個個副口面都衰到一個點,衰到係人都想打_佢哋。」

    當時,朋友講緊呢番說話嘅場合,其實係一班老死嚟到阿七屋企開大食會同傾偈,阿七個仔已經係中學生,聽兩句粗口都無咩嘢嘅,同埋信得佢過唔會亂學,所以由得朋友繼續爆落去。不過,在場有另位朋友,個囡囡比較細,我就叫阿仔帶佢入房玩。

    朋友續繼爆:「啲職員態度係非常咁惡劣,官腔到你以為返咗大陸,但係明明佢哋係香港人,真係好學唔學,香港人都恰香港人,幾_街!慘在係完全無得投訴,完全係專制到一言堂,所以無另一個監管制度去制衡,或者無競爭,就只會引致絕對嘅腐化。」

    嗱嗱嗱,唔好含沙射影喇,我哋唯有問:「究竟你受咗咩刺激呢?」

    佢話:「去到絕對會覺得混亂,排隊排到癲都算啦,我都預足一日去搞。最嬲係佢真係夾硬要你跟佢哋買保險,嗰度係得一間『中國__保險』,我只不過問句可唔可以出面買?,個女人塊面黑_到呢,之後就唔同我處理。我死死地氣話:『俾我望吓份保險計劃都得掛。』佢就遞張紙俾我,完全唔解釋,就咁叫我買,我就當破財擋災,快啲搞_掂佢就算。」

    大家見佢咁火滾,就話:「俾錢都要受氣,真係辛苦哂。」

    「你想佢哋態度好少少,就要買貴啲嘅plan囉,真係好過份!我見到有人喺出面買咗保險,個保險大姐就直頭玩_佢,左睇右睇,搞成個鐘頭都唔肯同佢處理,幾_賤格!」

    「唔怪之得你咁嬲!」

    「仲有呀,好彩我架係新車,驗車嗰度都無咩留難到我,不過我聽到啲人同啲職員嘈到媽媽聲。好似有個人話佢去咗相熟車房驗過,明明話無事,呢度就死都要佢去附近一間車房再睇,嗰間車房都無咩幫佢特別整啲咩,咁就要俾幾舊水,之後又送返去驗過,又要俾多次覆檢費,咁先俾佢過關。好明顯啦,驗車公司刻意留難,逼個車主去就近幫趁車房,你話無回佣?無利益輸送?我唔_會信囉!呢啲直情要搵ICAC啦。」

    「嘩,咁好過去搶喎。」

    「係㗎,基本上個個入去都俾人掠一筆,最易掠就係照副偈嘅engine number,因為就算你搵車房做咗拓印,佢唔會信你俾佢嘅number,點都要積起你架車去照吓,呢筆費用點都要俾。」

    「咁你今次已經搞掂咗?」

    「係啦,不過係年年都要搞一次呢,即係下年又要受多次氣。喺中港車牌上,可以睇到邊個月要驗車,1等於11月,2等於12月,3至0等於3至10月,唉!總之一諗起下年又要去,就真係覺得好煩。」

    阿七俾朋友呻到夠,佢就無嘢啦。

    不過,阿七就念念不忘嗰間「中國__保險」,sell都唔使sell就有無窮無盡嘅生意,真係恨到阿七流晒口水,不過阿七無強國嘅護庇,所以呢啲機會唔屬於我。正面啲諗,阿七用實力搵客,唔使俾人媽媽聲鬧,仲多咗朋友,又積番啲陰德,好過賺不義之財。呢啲錢賺咗,到你午夜夢迴人都唔安樂啦,唔好話唔信邪,阿七識咁多人,真係見過有啲人做得多陰質嘢,下場都幾悲慘,有機會再分享啦。

     

    作者:小胖阿七
       本地保險業界先驅,40年前入行的首批從業員,見證無數高低起落,由高峰期的月入20萬的中環人,到突然要由零開始call單儲客,唔介意分享經驗,最緊要你哋聽完有錢落袋。

  • 20190729 10630 C 00

    又到暑假,身邊唔少老友都一家大細去遊埠,日日Facebook都俾啲旅行相洗版,可惜阿七今年要跑山,暑假就行唔開嘞。

    20190729 10630 k01

    講開旅行,阿七有個客兼老友,又係想趁住暑假同老婆仔女去土耳其玩,雖然我冇得去,但想成人之美,咪幫佢一家人幫團囉。因為呢位朋友一家人係由內地移居香港,仲未係永久居民,正值呢段過尷尬時期要中港兩邊走,所以就叫阿七幫佢哋去某大旅行社報一個價值萬二蚊嘅土耳其團,見佢咁爽手過數俾阿七,咪即管幫佢。

    報團嗰陣,旅行社職員千叮萬囑:「一定要自己辦簽證,我哋唔能夠代辦。我哋張單據有條款寫清楚,如果因為簽證問題而不出唔到發,係唔會退款。」

    阿七都千叮萬囑朋友,一定一定一定要自己辦簽證,真係重要的事要講30幾次,煩到個朋友都話:「行了行了,我知道啦!」佢仲話,國內有代辦,佢會搞得掂。OK,咁就得啦,祝佢玩得開心啲。

    點知……阿七都唔知佢搵咗咩代辦,佢去到機場搵領隊,個領隊一望,就一臉無奈咁講:「你們這個是非合規簽證。」

    阿七聽到真係嬲咗,唔係嬲旅行社,係嬲個朋友,叫極佢都仲係錯。當中詳情我冇心機問,總之結果就係佢哋成家大細無得上飛機,睇住啲團友入晒禁區,佢哋就拖住行李喼返歸。佢好唔開心咁打俾旅行社要求退款,當然啦,人哋條款都寫到清清楚楚,錯又不在對方,點可能退款,如果咁都退得,啲旅行社一早執鬼晒啦,衰啲講句,呢度仲有少少法治,仲會講合約精神嘛。

    個朋友真係好不滿,叫阿七陪佢踩上旅行社理論。吓!阿七賣咗咁多年保險,都好著緊條款。保險就係一份合約,講求最高誠信,有咩爭拗都係睇條款,大家尊重合約精神,先至可以有保險存在。

    我話:「但是,真的是你們犯錯,他們有權不退呢!」

    佢話:「我不管,我要去!」

    唉,見一場朋友,硬著頭皮陪吓佢去啦。

    去到旅行社,職員就幫佢退咗少少印花稅,其餘團費當然唔可能退啦。

    朋友就不斷同職員講要求退款,職員就指住單據上嗰一行條款。朋友突然轉頭望向阿七:「你幫我說說吧,我說普通話他們不聽我的。」

    吓?關咩事呀,我哋行咗兩文三語好耐啦。個職員就係完全明白你想點,所以先企到咁硬。仲有呀,阿七咁樣陪佢嚟,本身已經覺得好核突,仲要我幫手出聲?

    於是阿七拉咗佢出門口,認真咁同佢講:「他們真的有權按照本子辦事,也沒辦法呀。」

    「不!一定有,我立刻想到6個方法。」

    「什麼?六個那麼多?」

    「第一是每天坐在旅行社門前抽煙,見到他們有客就過去跟他們說這是黑店;第二是在網上寫臭他們;第三是到你們的消委會投訴;第四是去旅遊業議會投訴;第五是到海關投訴;第六是找傳媒投訴。」

    大佬,香港啲「自由」笨唔係咁用喎,佢當然可以咁做,不過絕對會係嘥自己時間攞假嚟丟,最後都唔會達到佢嘅目的。

    阿七細心同佢解釋點解呢六個方法唔work,點知換嚟佢一句:「什麼都不行,你到底是不是來幫我的?」

    Well,想幫你慳返啖氣暖吓肚啫,咁阿七都無嘢講啦,原來佢去唔成土耳其,結果轉咗去參加「無賴投訴團」,咁一場朋友,佢去邊玩我都仍然會祝佢好人一生平安嘅。希望佢去完呢個投訴團返嚟,會真正明白咩叫做合約精神,有錯就要認,千祈唔好好學唔學,走去學啲高官咁做無賴,套用阿人氣議員一句:真係唔好再咁玩啦,好冇?

    作者:小胖阿七
       本地保險業界先驅,40年前入行的首批從業員,見證無數高低起落,由高峰期的月入20萬的中環人,到突然要由零開始call單儲客,唔介意分享經驗,最緊要你哋聽完有錢落袋。

  •  10930

    我係小胖阿七,有名你叫啦,真係有少少肥,不過算係託賴,以60歲人嚟講,咁多年都算無咩嚴重疾病,呢個都同阿七做保險呢行有關,因為見過唔少客人有大大小小身體問題,都有警惕作用,所以阿七會定期驗身,仲會去做下運動,係阿七比較為食,人到中年,新陳代謝慢咗,就養咗個肚腩仔。

     20191023 10930 k01

    不過,阿七有啲朋友仔就無咁好彩啦,有啲到40、50歲,身體就出現唔同問題,最common就聽到「三高」──高血糖、高血壓、高血脂,仲有尿酸、痛風,呢啲都濕濕碎,一般戒口同運動都可以改善。較嚴重係糖尿病、脂肪肝、肝硬化、大腸癌、中風、心臟病、腎衰竭等,聽見都覺得恐怖。

     

    根據衛生署資料,中央肥胖就係女性腰圍超過32吋、男性腰圍36吋,大家快啲睇下自己有無超標。以阿七目測,身邊都幾多朋友有中央肥胖!主因係香港人較多出外用餐,餐廳餐單多數多肉少菜,而且好多人運動不足,返工成日坐,仲要成日涼冷氣,排唔到汗又排唔到毒,健康梗係受影響啦,就會出現唔同嘅健康問題!

     

    呢啲疾病要有年輕化跡象,阿七有個朋友,38歲就中風入院,喺醫院瞓咗好多日,一邊身唔太郁到,醫生話之後要花一段長時間做物理治療。佢係家庭經濟支柱,個仔仔先得6歲,太太愁到不得了,擔心丈夫情況,又驚交唔到租,同時又要照顧好小朋友,阿七一聽到,真係為佢哋擔心!所以成日話,愛錫身體,就等於愛錫家人。其實,呢位朋友後生時都幾fit,成日打波,喺小朋友出世後,佢就成日話忙,就一年比一年肥。阿七都有小朋友,有小朋友之後真係好忙,無咗好多私人時間,同時又想勤奮啲去工作多啲,想賺多啲去改善家人嘅生活,所以真係忙到呢……但係幾忙都好,一定要抽時間去keep好自己個身體,寧願花啲啲時間去做運動,好過到出事時後悔莫及。

     

    點解咁多人唔運動?當然有好多原因啦,忙囉、攰呀、無地方呀,不過最大原因──就係一個「懶」字。好似阿七住嗰個大型屋苑,都起碼有千幾戶,gym room細到得3架單車機、3架跑步機,但係阿七次次去到,明明係假日都有位,無人爭住用,咁方便就腳嘅設施都得咁少人?如果唔係懶,係咩呢?

     

    做運動係有益身心,可以舒緩壓力!只有建立咗做運動嘅習慣,就會唔做唔舒服,不過凡事起頭難,大家可以諗下點樣令做運動變得有趣,例如約埋朋友一齊做、揀自己鍾意嘅運動做。阿七就有為自己設計目標計劃,譬如要游哂全港公眾泳池、跑哂全港運動場,睇下邊個場最舒服。當自己游哂全港公眾泳池、跑哂全港運動場,就發現不經不覺間已經建立咗做運動嘅習慣,仲可以係一家大細親子活動添。

     

    作者:小胖阿七(Facebook專頁按此)
       本地保險業界先驅,40年前入行的首批從業員,見證無數高低起落,由高峰期的月入20萬的中環人,到突然要由零開始call單儲客,唔介意分享經驗,最緊要你哋聽完有錢落袋。

  • 20190724 10604 C 00

    全黑西裝、黑領呔、黑皮鞋,黑色就係阿七當刻嘅心情。

  • 2019070 10563 C 00

    「阿七,你book咁大間meeting room嚟吹風呀?」

  • 10689 20190820

    近來,多咗客人嚟問阿七一啲保險嘅定義,以前呢,通常大家買完保險就好安心,好少咁樣不斷發問,點解啲客好學咗?無法啦,香港越來越多光怪陸離嘅事,搞到人心惶惶、人人自危。

    20190820 10689 k01

    「阿七呀,我個女呢,都有去示威,如果期間受傷,保險賠唔賠先?」
    「問得好呀!我哋慢慢釐清問題先。首先,要視乎你買咗咩保險,如果係人壽,一般都唔保一年內嘅自殺,其餘就算係示威、騷亂、非法活動等等都會包。」
    「阿七,乜你一嚟就講人壽,嚇鬼咩?我阿女唔係去衝嗰班最前線,應該都唔會咁嚴重嘅。」
    「我唔係想嚇你,不過諗住講個最少爭議嘅保險先,因為最易理解。之後,我哋講危疾,當中都包心臟病、失明、失聰同斷肢。危疾就唔保自殺或自致傷害,所以新聞講嗰位叔父突然心臟病發,如果佢未有心臟病前已買危疾保,咁咪有得賠危疾囉。不過,醫療保同意外保就唔賠俾佢啦,你知唔知點解?」
    「佢犯法?」
    「如果俾人影到佢打人,或者有證據指佢係犯法,醫療保、意外保,以至旅遊保啲條款,就會有比較多不保事項,一般都會列『恐襲』、『暴動』、『戰爭』、『參與非法活動』等等為不保事項。」
    「政府同警方一時又話係『暴動』,一時又話只係少數人先有暴動,咁又點計呀?」
    「政府講法較含糊,新聞報道一個港台司機受傷,就係因為政府話係『暴動』而無得索償,政府之後又改口風,咁保險公司又繼續俾佢申請。」
    「定義都好緊要喎。」
    「係,如果你個女係參與已申請嘅遊行就唔使擔心,因為呢啲係合法活動,期間有啲咩損傷都可以claim醫療保。但係,如果個遊行路線或時間唔係不反對通知書裡面批准嘅,有機會變成『非法集結』,期間有受傷,咁就有爭議啦,保險公司有機會唔賠。」
    「如果我只係路過而受傷呢?」
    「你無『參與』,應該無咩問題,不過如果件事被定性為『戰爭』或『政變』,咁路過都無得保喇。」
    「頭先你話參與合法遊行受傷可以claim醫療保,但你無講意外保嘅?有無得claim呢?」
    「心水清呀吓你,因為意外保會有更多爭議,話明係『意外』,即係真係『意料之外』,喺和平合法示威中受傷,參與定路過嘅,正常就claim到意外保。但係,萬一已出現武力衝突,受保人明知有危險都去嗰度,無論參與定路過嘅,有啲保險公司有可能認為唔係『意料之外』,咁就有機會賠唔到。」
    「咁都有得拗喎,點證明我係『明知』有危險?」
    「嗱,作為agent,我只可以講保單上的字面解釋俾你聽,到最後都係要保險公司索償部審批,我嘅工作係填claim form,仲有問個客拎單據同醫療報告,盡力幫客人申請,之後等保險公司審批。」
    「元朗嗰單白衫人打港鐵乘客,政府無話係『恐襲』,咁實有得賠啦。」
    「又未必喎,雖然政府無話係『恐襲』,但係呢單嘢,同一般保險公司對『恐怖活動』嘅理解有啲接近喎,因為係『引起公眾恐慌』嘅『暴力行為』,而家都係睇吓啲真實索償情況,等緊保險公司決定,暫時我都答唔到你。」
    「都真係幾複雜吓……」
    「係呀,唯有盡量保護自己啦!你阿女出去遊行,都要叫佢小心啲呀!」
    以上只係一啲概括情況,唔同保單有唔同條款,所以要睇番自己份保單。而唔同保險公司亦會自行詮釋保單條款,所以賠唔賠到,最後都係睇保險公司決定。阿七會繼續密切留意件事,希望大家萬事小心,好好照顧自己,香港人加油!

    作者:小胖阿七
       本地保險業界先驅,40年前入行的首批從業員,見證無數高低起落,由高峰期的月入20萬的中環人,到突然要由零開始call單儲客,唔介意分享經驗,最緊要你哋聽完有錢落袋。

  • 10791

    最近阿七都收唔少手信──日本、韓國、泰國、歐洲啲零食,因為唔少朋友趁小朋友放暑假,一家大細出外旅行,返嚟分享吓玩咗同食咗咩嘢,一齊睇吓相。

    20190917 10791 k01a

    不過,幾多朋友問阿七差唔多嘅假設性問題:「如果咁啱出發嗰日,機場因為有示威而上唔到機,保險賠唔賠?」「如果咁啱返嚟班機取消咗,因而滯留外地,保險賠唔賠?」「自由行去玩同跟團去玩,有無話邊個保險容易賠得到?」

    拎咗少少手信,就梗係要解答疑問,阿七今期不如寫一寫旅遊保啦!

    嗱,政府一直未搞得掂「反送中」示威,短期內似乎都平息唔到抗爭,之前就有機場示威令到機管局取消咗航班。真係有旅客行程受阻,旅遊保險包唔包呢?首先,老土啲都要講句:各大寶號嘅保單條款都唔同,真係真係真係(重要的事要講3次)要睇清楚自己買咗咩,唔清楚就問返保險公司。阿七可以講嘅只係一般常見嘅保單情況。

    如果情況係「行程延誤」或「航班延誤」,多數旅遊保都係以延誤6小時以上為基礎,先至會有賠償,一般如果係因為「暴動」、「騷亂」、「罷工」、「惡劣天氣」等原因而延誤,都有得賠。不過,如果係因為「恐怖活動」、「機場關閉」,就通常無得賠。賠償通常會係現金,主要係補償受保人因延誤而等待期間嘅支出,例如喺機場飲食嘅消費。所以,如果咁啱出發嗰日機場有示威而上唔到機,或者咁啱返嚟班機取消咗因而滯留外地,係較有機會得到賠償。不過要留意,保險公司一般會寫明係賠償「合理支出」,唔好諗住好大筆數。

    旅遊保單上亦有「更改行程」一項保障,因為有延誤而可能導致更改行程,就有機會引致額外交通和住宿費用,同樣都係要合理支出。總之記得保留所有相關單據同航空公司發出嘅延誤證明同登機證,先可以向保險公司索償。

    至於跟旅行團嘅保障又如何?都係嗰句,一定要睇番條款,旅行社一般有指定合作保險公司,跟團最好自己先去了解保障範圍同賠償金額,有咩唔清楚就問返旅行社。如果覺得保障唔夠好,就最好自己另外再買多份旅遊保險打底。

    另外,阿七聽過一啲朋友話旅遊保好容易買,臨飛前先喺ATM櫃員機買。阿七都要提醒番大家絕對唔好咁做!最好喺確定行程之後,就盡早買埋旅遊保險。點解?旅遊保其中一個不保事項係「在申請保險時或之前已經存在或宣佈或為公眾所知的任何事件或情況」,即係話,新聞都講咗過兩日有好大機會打風,你仲等到last minute先去買旅遊保險,到時真係打起風上嚟,保險公司好大機會拒賠與颱風相關所引起嘅賠償。咁你越遲起保,咪越大機會出現已公佈嘅消息囉,於是就多咗不保事項。

    好彩身邊朋友都只係好奇咁問一問,今次冇人真係因為事件而令到行程受阻,同阿七一樣,今個暑假去同小朋友玩得開開心心,暫時放低種種煩憂。

     

    作者:小胖阿七
       本地保險業界先驅,40年前入行的首批從業員,見證無數高低起落,由高峰期的月入20萬的中環人,到突然要由零開始call單儲客,唔介意分享經驗,最緊要你哋聽完有錢落袋。

  • 【小胖阿七】為環保轉揸電動車?香港好難搵位充電

    阿七揸咗咁多年車,一直都好想盡番一分力環保啲,轉用電動車,唔係因為電動車有稅務優惠,而係真心想減少啲污染,等空氣清新啲,電動車係有效減少路面懸浮粒子嘅方法。有小朋友就更加會注意呢樣嘢,大家都想為下一代出一分力。

     

    阿七花咗啲時間去研究,結論係:自己無條件用電動車!甚至可以大膽講,香港大部分駕駛者都無條件轉用電動車。首先,充電就係一大問題,公共電動車充電設施,截至今年6月底,全香港有2,308個公用充電器,但喺香港登記嘅電動車已經過萬架,即係平均5架車分享一個公共充電設施!更嚴重嘅係,有啲仲要係中、慢速,即係要花6至8個鐘先充滿電!而且大部分喺港島同九龍,新界就少啲。阿七有朋友揸電動車,成日要出入荃灣,佢就話有時無電,就會去熊貓酒店嗰邊充電,通常排隊都要半粒鐘,充電又要半粒鐘。嘩!趕起時間嚟,點搞呢?

     

    出去搵位充電已經夠麻煩,最大件事係喺屋企停車場都無得充電!聽聞一啲新樓盤停車場會有充電位,但係阿七係住舊屋苑呢,所以就無福消受。阿七問過管理處,問吓可唔可以加番個電掣,管理處一句就話:「大廈公契唔俾喎,如果要改公契,你要聯絡業主立案法團去傾啦。」咁阿七都無咁容易放棄,所以走去問過律師朋友。

     

    律師朋友話:「香港物業的確係好跟公契,要其他業主同意,再搵律師先改得。」

     

    「咁無咩可能啦,又唔係個個揸車,揸電動車嘅人又唔多,其他業主點會理你?」

     

    單係充電已經咁大問題,仲有維修又係一個問題,因為電動車同引擎車唔同,唔係普通車房可以維修到,需要有機械工程、電力同電子工程等知識,於是有壞就要靠原廠維修,維修保養費都貴啲。

     【小胖阿七】為環保轉揸電動車?香港好難搵位充電

    其實,香港都算係個發達嘅城市,但係喺環保政策方面,就真係落後咗啲,政府係有能力去推動環保政策,而阿七亦相信,推廣電動車嘅政策係無咩爭議,因為電能車喺全世界都係一個大趨勢,遲早都普及,早啲做好準備仲好啦。

     

    當然,最環保梗係多啲用公共交通工具。揸車無疑係比較方便,尤其是對有小朋友嘅家長。不過,如果有時間地點又唔難去,阿七都會向小朋友提議:不如一齊搭巴士、港鐵。一齊搭車,可以專心同小朋友講解四周圍嘅事物,係一個好難得嘅親子機會。嘅然未有完善嘅充電配套,阿七想盡一分力做環保,就要靠減少啲揸車喇。

     

    作者:小胖阿七(Facebook專頁按此)
       本地保險業界先驅,40年前入行的首批從業員,見證無數高低起落,由高峰期的月入20萬的中環人,到突然要由零開始call單儲客,唔介意分享經驗,最緊要你哋聽完有錢落袋。

  • 10825

    話說之前趁暑假未完,約咗班有小朋友嘅朋友嚟阿七屋企玩,大家一齊食嘢、打機、玩boardgame,咁就玩咗大半日。有小朋友嘅朋友都唔會玩太夜,晚餐食完先至8點半,大家就已經起身走人。有位朋友就留一留,因為佢太太就生第三個小朋友,佢想加多少少人壽,阿七就順便幫佢處理文件。

    20190924 10825 k01

    人壽相對係較易理解,朋友又唔係第一次買,所以好快簽好文件,同快快講一次啲條款,之後朋友就可以回家,9點搞掂。

    正當阿七喺度收好文件時,阿仔就走過嚟問:「Daddy,你唔知一年有幾多學生自殺?」

    「吓?」嚇得阿七個心離一離,即刻問:「咦,點解你突然提呢個話題?」

    「無呀,我頭先聽到Daddy你講到自殺。」

    「哦,我頭先講到其中一個不保事項,基本上,所有人壽保險都有『自殺條款』,就係首年或首兩年自殺,不論神志正常或失常,都唔會得到身故賠償,保險公司只會退還已繳保費。呢個係為咗避免『道德風險』。你頭先聽到呢個,所以就關心『自殺』呢個議題。」

    「都係,就嚟開學啦,其實年年一開學,都有見到學生自殺嘅新聞,我今年特別擔心,因為唔好話小朋友啦,好多大人都開始有抑鬱症狀。」

    「嗯,你講得啱,你嘅擔心絕對值得社會各界去關心,宜家社會氣氛咁差,好多小朋友都無辦法好好享受應有嘅暑假。」

    「頭先Daddy同uncle簽緊保險,我就上網search咗,2018至2019學年就有31個學生自殺,最細得10歲咋。」

    「10歲?小學生咋!」

    「係呀!睇返政府講咩,都幾冷血吓,Daddy你睇吓。」阿仔遞咗個pad過嚟。

    「當時嘅教育局局長吳克儉話大專生在壓力下『有啲唔舒服嘅嘢就頂唔順』,唉,無建設性嘅廢話,仲要令人超反感。」

    「咁Daddy覺得問題係咩?」

    「嗯,好多喎,香港教育制度一定有份啦,一試定生死。啲學校仲要咁睇重成績,鬥多功課,又太早教過深嘅嘢,如果搞小班教學,老師就可以充分照顧到學生,學校又無咁驚收生不足,咁就唔會有啲惡性競爭。同社會又有關啦,工種同機會比我嗰個年代少啦,咁年輕人咪容易覺得前路不明。仲有家庭都有責任啦,父母係最多時間對住小朋友,有無用心同小朋友溝通呢?阿仔你又覺得呢?」

    「我同意呀,我唔明政府點解寧願倒錢落海,都唔放多啲資源喺教育。」

    「政府政策呢,我哋暫時都要好無奈地接受。你係個中學生,身邊有好多同齡朋友仔,你覺得普遍有啲咩會困擾你哋,有咩建議俾到家長呢?」

    於是,兩仔爺就展開一輪深入嘅「兩代對話」,我話覺得好多嘢都唔係話想爭取就可以得到,但阿仔就話佢同好多同學都覺得唔試過又點知唔得。我再解釋社會好難一時三刻就可以改變,受好多因素制肘,佢就話明白成年人有好多顧慮,但就唔希望我哋作為家長咩事都輕易否定佢哋,例如成日話佢哋俾人洗腦,或者你仲細唔識諗。

    好彩嘅係,我同阿仔嘅對話好理性,冇爭執冇對罵,大家都係攞件事出嚟討論。後生呢一代,一出世就識上網,睇到嘅世界同我哋唔同,識嘅嘢可能比大人想像中仲要多。

    阿七知道呢篇文章會出現喺「親子頭條」平台,所以好想同各位爸爸媽媽分享:同小朋友溝通真係要放下執著,坦誠同佢哋傾偈,唔好咁多否定、批評、責罵。世界變得好快,快到有時我哋真係跟唔切,我哋絕對需要同小朋友連繫,一齊學習同進步。政見可以唔同,但係永遠唔可以推開我哋嘅小朋友,要隨時喺佢哋身邊關心佢哋。自殺死亡數字只係冷冰冰數字,但係對我哋為人父母,小朋友係有血有肉、會喊會笑嘅寶貝,佢哋有理想、有諗法其實係好事,試吓了解佢哋點解會咁諗,無論意見有幾唔同都好,千祈唔好輕言放棄。

     

    作者:小胖阿七

       本地保險業界先驅,40年前入行的首批從業員,見證無數高低起落,由高峰期的月入20萬的中環人,到突然要由零開始call單儲客,唔介意分享經驗,最緊要你哋聽完有錢落袋。

  • 10863

    最近,有個客份保險plan到期,可以拎番200幾萬,所以阿七搵佢去簽文件,順便了解佢需唔需要其他plan,一問之下,佢就話:「唔需要啦,我而家一有保險、定期到期,就搬啲錢去外國。」

    20191008 10863 k01

    「移民?」

     

    「移唔移都好啦,錢都要搬走架啦。」

     

    「嗯,呢排好多朋友係咁調走資金,都係信心問題?」

     

    「好明顯啦,對成個政府都無信心,一個問題都可以拖咁耐,一早處理咪無事囉。」

     

    見個客一臉不滿,似乎要大爆發,都係轉話題:「咁你轉啲錢去邊?」

     

    「英國呀,其實都好方便,唔使專登飛去英國開戶口,一般香港大銀行都開到離岸戶口,有好多國家可以選擇,不過最common都係美國、英國、加拿大、新加坡嗰啲啦。」

     

    「你點解揀英國呢?」

     

    「無嘅,反正想送個仔過去讀書,都唔排除一家人將來移民過去。話時話,通常夠100萬港紙都可以開離岸戶口,你有無考慮吓?」

     

    「我會嘅,學你話齋,我都60幾歲人,天跌落嚟都唔驚,但係我個仔得十幾歲,佢仲有大把日子要過,就算我唔理我自己,我都要幫佢安排一吓啦。」

     

    「話又唔係咁講,我哋有能力當然要幫下一代,但係我哋自己都要搵定後路,辛辛苦苦捱過半世,想享吓福都應該呀,你都唔想一鋪清袋吖?」

     

    個客呢幾句真係好觸動到阿七,阿七到60幾歲就俾服務咗40年嘅公司逼走咗,本嚟月月20萬收入就成泡影……阿七已經衰咗一次,而家重新建立緊嘅嘢,阿七點會想再次失去?

     

    個客繼續講:「你睇吓呀,馬雲咁有錢都要『被退休』,李嘉誠捐咗咁多錢俾大陸又點呀?講句嘢都俾官媒鬧!而家收到風,央企要控制香港公司同資產,一個『莫須有』罪名就可以搶奪咗啲商人嘅功勞。做有錢佬都做得咁唔暢快,超級富豪都咁無奈,何況我哋呢啲得少少錢嘅?我啲朋友都係話走得就走。」

     

    「嗯嗯,理解嘅,大家都係想搵一個地方係會保障到自己嘅資產。」

     

    真係好感慨,一個地方應該要吸引資金,多年來因為香港嘅獨特歷史背景,因為得到國際認可,先會吸引外資,但係而家?當政府政策一次又一次違反國際標準,就漸漸失去國際認可,不但外資會走,本地投資一樣會走。走咗嘅資金好少會返嚟,於是大家只會越來越無信心,陷入惡性循環之中。作為小小市民,只能盼望政府做正確決定,再次令國際有信心。

     

    作者:小胖阿七
       本地保險業界先驅,40年前入行的首批從業員,見證無數高低起落,由高峰期的月入20萬的中環人,到突然要由零開始call單儲客,唔介意分享經驗,最緊要你哋聽完有錢落袋。

  • 10948

    星期日揸車接送阿仔去課外活動,同平日一樣,同阿仔一齊聽電台,有時又討論節目內容,今次係歌手衛詩接受電台訪問,一講起,佢10年前因為吸毒事件而離開樂壇一段長日子,10年前嘅事,阿囝應該唔多識佢卦。

     20191028 10948 k01

    「阿囝你識唔識佢?」

     

    「識呀,佢孖生家姐咪係衛蘭。」

     

    「衛詩消聲匿跡咁多年,咁你都識,咁勁。」

     

    「佢家姐都一直有演出,所以啲人仲會記得佢呀。」

     

    「諗番起10年前,佢咁後生,真係大好前程,點知走去吸毒,一剎那真係咩都無哂。」

     

    「好彩都可以起返身。」

     

    「跌倒都唔緊要,最重要係識起返身。」

     

    我哋一齊聽住收音機中佢講自己最低迷嘅日子,知道佢自此有返教會,拍過福音電影,為教會服務,反思過往嘅錯,慢慢就企返起身,宜家再次重新出發。

     

    「嗯,有好好反思同改過,都係難得嘅,不過最好就一早唔使跌得咁傷,阿囝你覺得有咩方法可以令自己唔好錯得咁嚴重。」一齊做個案討論,係非常好嘅親子教育,阿七又點會唔把握呢?

     

    「我覺得要感恩,好似佢講到當年因為喺娛樂圈好大壓力,所以一時抵唔住誘惑而吸毒,但係佢後嚟去非洲探訪,佢自己都識講當地人生活條件好差,自覺自己好舒服,呢個時候佢就識感恩啦。如果喺10年前,佢識得感恩可以同家姐一齊努力,又有公司去捧佢,佢就唔會咁唔識自愛。」

     

    「講得好好呀!」當然啦,阿七喺阿囝細細個開始就同佢討論故事,一齊諗吓有咩教育意義,所以訓練到佢有分析能力,阿七成日話寧願睇多啲人點樣跌,好過自己傻更更跌死。

     

    再問下阿囝:「咁你覺得佢宜家值唔值得得到鼓勵?」

     

    「都值嘅,宜家聽落都幾誠懇,相信佢都真係知錯,不過如果佢日後再次犯同一錯誤嘅話,就一定會令人好失望。」

     

    「所以真係希望佢好好珍惜宜家擁有嘅一切。」

     

    啱啱好到達目的地,阿囝落車時,除咗好有禮貌咁同阿七講:「唔該Daddy。」仲加多一句「I love you, Daddy」嘩!Sweet到呢,阿囝學嘢真係快到呢!阿七都快快回應:「I love you, too」。

     

    其實,真係要成日有個感恩嘅心,因為世事難料,幸福唔係必然,東方人係比較含蓄,但係都要好好向親人表達愛與支持,當家庭成員遇到啲咩困難時,就會主動去求助,而減少鑽牛角尖嘅情況。

     

    作者:小胖阿七(Facebook專頁按此)
    本地保險業界先驅,40年前入行的首批從業員,見證無數高低起落,由高峰期的月入20萬的中環人,到突然要由零開始call單儲客,唔介意分享經驗,最緊要你哋聽完有錢落袋。

     

    圖片來源:Jill Vidal 衛詩 Facebook

  • 20190703 10545 C 00

    話說有個星期六,阿七好努力改晒appointment前後嗰幾日,因為應承阿仔要去灣仔睇佢打波。你知啦,一係唔好應承,應承咗小朋友就一定要做到,否則佢真係會記你一世。於是孖埋老婆去做啦啦隊,我哋就一齊出發去灣仔。

  • 20190619 10507 C 00

    阿七啱啱見完朋友,不禁有感而發,因為朋友係一名健壯大男人,但係佢講講吓嘢,阿七突然發現佢眼泛淚光。