【甘寧老師】想教好仔女 一定要帶佢搭輕鐵

1.訓練誠信

可能唔係住係元朗區或屯門區嘅人對輕鐵可能比較陌生,輕鐵嘅入閘設計簡直就係訓練仔女誠信嘅最佳教育工具!因為月台係可以自由出入,收費方法就係大家要憑良心,上車前係月台拍「入站」落車拍「出站」,而且只可以單一方向乘車!姐係你想坐返轉頭,都要好自動自覺落車拍「出站」再拍「入站」再上返車!

 

當然偶爾都會有工作人員查飛,但大部分時間成個交易大家都係講個信字 。

20160722 4098 a2

2.訓練記憶

搭輕鐵除左訓練到仔女誠信之外,對記憶力提升都有幫助!因為拍左「入站」之後唔記得「出站」係會扣最高單程車費!同時由於月台係可以自出自入,有時都會懷疑自己係咪未入站,好似冇乜印象自己拍過卡咁,一陣比人查飛咪又要比人罰錢!

3.訓練EQ及明白運動的重要性

20160722 4098 a3

輕鐵月台並不大,但係人就好多!除左等車嘅乘客多之外,「波板糖人」都好多!(車站助理會拎住酷似波板糖的指示牌工作,因此網民形容他們為波板糖人),每一對車門都會有2個,不停重複住講「先讓乘客落車然後上車」、「請企係黃線後,危險啊!」等錄音機都做到嘅功能,令擠迫嘅月台更加擠迫!

雖然駐場的「波板糖人」有很多,但仍無礙大家玩美式足球的欲望,車門一開,雙方陣容就會發生強勁嘅碰撞!個身子潺弱些少都會比人撞散,比人撞多兩撞仔女就會意識到平時做運動有幾重要。

 

 

 

(*講明先,我覺得「波板糖人」都係為左份糧做野,有冇用就見仁見智啦。)

20160722 4098 a1

而係月台嘅乘客就好似餓鬼咁衝入車廂將全部座位瞬間吞噬,當然其間少不免同想落車嘅乘客有磨擦,繼而在車外發生口角爭執!車內嘅乘客都不甘示弱,

「我睇到先o架個位」

「但係我坐先啊嘛」

整個月台及車廂嘅氣氛令炎炎夏日繼續升溫,仲增添多幾分火藥味,呢個時候你帶埋仔女企係一邊!成堆反面教材任你用,我相信只要用得好、用得恰當,仔女嘅Emotional Quotient又點會無進步呢!

每次同仔女坐完一次輕鐵我都可以好自豪咁講,我地坐嘅唔係一架開往家中嘅輕鐵,而係一架昇華品格嘅列車!

圖片:網絡

田叔叔英語閱讀計劃2023-24
田叔叔英語閱讀計劃2023-24
 親子最關注
香港優質教育機構巡禮 2024