【長腿爸爸】阿囡問「揸價」 我當堂嚇一跳然後得啖笑

玩緊煮飯仔嘅阿囡突然咁問,本來篤緊手機嘅Billy Cool即刻回一回神,問:「你話揸咩話?」

阿囡再問:「『揸價』呀,頭先電視個叔叔係咁講。」估唔到細路女咁好耳,財經台個受訪者只係講咗一次呢個term,佢就已經留意到。

「『揸價』即係……」咁複雜嘅概念點講俾細路女聽好呢?「不如聽爸爸講個故事好嗎?」於是,我就同阿囡上咗人生第一堂投資課,不妨喺度分享。

早年Billy Cool買物業都鍾意跟某一、兩個相熟agent買,不過後來開始改變習慣,對陌生agent會抱開放態度,咁就有更多機會接觸市場資訊。呢個都係受城中人稱「波叔」嘅超級富豪影響,呢位資深投資者睇盤而唔睇人,agent有筍盤就可以直接call佢。

近幾年我幾睇好觀塘工廈,事實上由5、6年前嘅4,000蚊一呎左右,去到今時今日,高至7,000蚊一呎都有。

近日,就有一個新agent call我,係一把後生、充滿活力嘅聲音,我一直都好欣賞好似呢啲咁有衝勁嘅後生仔!佢精神奕奕咁講:「Cool生,你好呀!有個筍盤想介紹俾你,觀塘一個靚區,面積3,400呎,呎價6,500,個盤真係好得架。」

一聽,個靚區係堅靚,我一直都有留意開,市面流出啲盤都唔太多,所以我都有興趣,不過話哂都係一個陌生agent,我要再了解,所以我同佢講:「我有興趣,不過要睇一睇資料先。」

正喺度做緊research時,佢再次來電:「Cool生,你好呀!又係我呀,既然Cool生有興趣,不如我試吓同業主傾吓,試吓6,200蚊一呎,好唔好?」

「咁你去傾下先,我仲睇緊資料。」

佢把聲係幾誠懇,可以平300蚊一呎,總數就係平成100萬,聽落都吸引,不過買物業唔係買棵菜咁,所以我都係要了解清楚。

正當我又喺度比較緊附近物業嘅價位時,呢位agent好殷勤咁call我,好有感情咁講:「Cool生,我幫你講到價,個業主OK,6,200蚊一呎,Cool生會唔會準備到票?」

「轉頭覆你呀!」

對方逼切態度,唔多唔少令客人心急,擔心錯過筍盤,不過我Billy Cool嘅節奏都唔係咁容易俾人牽引住嘅。

當我繼續睇資料時,有第二位agent call我,呢位係之前有合作過嘅,佢一開口就話:「有個筍盤,千載難逢,仲要係Cool生你鍾意嘅觀塘,6,100蚊一呎,面積係3,400呎,如果你鍾意,就快啲決定。」

一聽,啲資料咁熟嘅,一問之下,咦,根本係同一個盤。第一個就話6,500減到6,200,一個一嚟就話6,100。一係第一個agent「揸價」,一係第二個agent專登講低去搶生意。總有一個唔老實,Billy Cool選擇相信自己,所以回覆:「轉頭搵你呀!」

睇睇下,我估計呢個單位係值6,100一呎,所以我打俾第二個agent,決定跟佢買,點知佢回覆:「6,100,俾另一個客買咗啦,我幫你留意其他盤啦,有咩好嘢就第一時間搵你。」

就係咁,同我鍾意嘅盤擦身而過……

20190722 10600 J01

好肯定第一個agent喺度「揸價」,其實我都知「揸價」係agent慣常技倆,本來用嚟manage買賣雙方嘅expectation,都無可厚非,邊個業主唔想賣貴少少?邊個買家唔想買平少少?Agent揸價揸得好,好快令大家都滿意個價,順利成交。可惜,總係有啲agent揸得唔好,揸得太多,咁就令客人好反感。講真,而家周街agent,啲客都會醒目咁問多兩個agent,一問之下,揸價揸得太多嘅agent,就會俾人覺得好唔老實。揸還揸,都唔好揸得咁過份嘛。

聽到呢度,我以為阿囡已經瞓著,點知佢眼仔碌碌望住我,諗咗一陣入,攞起啲塑膠生果,口中唸唸有詞:「呢棵菜我5蚊買番嚟……」然後同我講:「爸爸,呢棵菜原本賣10蚊,已經好抵買架喇!今日再平啲,8蚊賣俾你啦!」

小朋友真係學得快用得快,雖然唔想佢咁快就被金錢世界污染,怕佢學咗,用嚟蠱惑同學仔,但調番轉諗,如果佢知少少呢啲概念,又真係冇咁易俾人呃嘅,任何事都有兩面,真係要同佢解釋多啲先得。

 

作者:長腿爸爸Billy Cool
   人稱工廈界Cool魔,十幾年前買入第一個工廈單位,賺到第一桶金,從此改變對財富嘅睇法:有生意當然要繼續做,但想賺大錢就要有準確嘅投資角度!

田叔叔英語閱讀計劃2023-24
田叔叔英語閱讀計劃2023-24
 親子最關注
香港優質教育機構巡禮 2024