【史高治叔叔】理財概念自細要學 大個唔會跌入財仔陷阱

最近有朋友準備開財務公司,仲問史高治夾唔夾份搞,史高治本住八卦心態問吓佢點玩法,佢好簡單咁講:「夾多夾少都得,一年16%回報。當你拎10萬出嚟,回報有$16,000。」

20191008 10862 k01 

「咁嘅市道,呢個回報ok喎,放數出去收幾多息?」

 

「40%。」

 

嘩!難怪啦,收成40%!大佬,銀行貸款先收2至3厘咋。

 

史高治越聽越好奇,再同朋友傾多啲。

 

「咁高息都有人借?」

 

「有!通常係啲做散工、廚房、運輸呀,佢哋唔係借好多,三幾千咁借都有。高息都要借架啦,因為佢哋嘅信貸紀錄個底花哂,銀行唔肯借俾佢哋架。」

 

「難怪啦。」

 

「其實收40%係必需,營運一間財仔都要交租、請人、賣廣告,仲要搵人去收數。」

 

當然,朋友間財仔係合法,佢唔係中介。不過,史高治只係問吓,冇諗過參與,呢啲「夾錢賣錢」嘅生意,始終過唔到自己嗰關,好似有啲道德問題。事關史高治望住大大小小嘅財仔喺電視賣廣告,話咩易借易還,成日都叫人先使未來錢,呢個觀念其實真係好差。曾經有人質疑呢啲係咪鼓吹過度消費,某大財仔老細就話:「唔係廣告鼓吹,係啲人本身想借錢。」老細梗係講得輕鬆,佢本身有咁多錢,個信貸紀錄咁好,可以同銀行以更低嘅息口借錢,之後就高利貸借返出去。咁好賺嘅生意,佢當然想多啲人借錢啦。

 

但係好多時,啲搵財仔借錢嘅人,就只可以顧住還息而還唔到本,到還無可還嘅時候,又搵另一間財仔又再借多啲,以債冚債,根本係個無底深潭,所以就一直還唔完,呢啲人嘅經濟情況只會越嚟越差,呢啲就係所謂嘅「貧者越貧,富者越富。」有本事嘅人賺多啲係無可厚非,不過史高治覺得如果能夠自小就教小朋友理財概念,有啲人就唔使搞到自己咁慘,成世揹住啲債做人。

 

諗諗吓,史高治細個時,學校都無教理財,係到大學自己睇好多理財書,咁先有返個良好理財概念。而家睇返阿囡學校,都唔覺佢哋有教理財。但係明明理財咁重要,都唔好講咩投資先,小朋友起碼要掌握得到儲蓄同債務管理呢啲基本概念。既然學校無教,作為家長,就要留意呢一個範疇。

 

其實,史高治睇過一啲坊間講兒童理財嘅書籍同課程,好多時建議家長喺日常生活中,例如去超市買嘢、新年收利是、俾零用錢時,趁機向小朋友灌溉理財觀念,所謂活學活用,令小朋友知道理財係同生活息息相關。

 

作者:史高治叔叔
   後生嗰陣,大學一畢業就入咗大銀行商業部做Sales,跟一班有名有利嘅客人打交道,有時可以跟埋一齊飲飲食食,花天酒地、燈紅酒綠嘅生活,造就今日呢個身經百戰又識玩識食嘅嘅叔叔。不過自從做咗老竇之後,史高治叔叔修心養性,決定將行內鮮為人知嘅見聞,喺專欄裡面一一公開。

田叔叔英語閱讀計劃2023-24
田叔叔英語閱讀計劃2023-24
 親子最關注
香港優質教育機構巡禮 2024