【珍寶豬欄】下半身大解放

 

 

我考慮咗幾日,決定搵日放假試試…嗰日我哋一早幫佢放晒屎尿,腸乾淨了!膀胱都READY了!好,波波雞下半身大解放,去以股交友吧!


由於屎尿呢啲嘢呢一刻清咗,並唔等如係全日都會冇貨交,為奴為婢嘅我唯有密切留意住波波雞跑跑跳跳時有冇滲咗幾滴尿出嚟,又留意吓佢瞓過嘅位會唔會有屎漬屎油屎粉嘅出現…呢一日放假,我過得好充實。


但係…波波雞似乎因為冇咗條尿片,佢好似有啲唔開心有啲自卑咁~呢日佢大部份時間都係自己一個瞓喺角落位,冇去撩過交打,冇去撩過佢嘅女神頭頭,就算有其他貓行過佢身邊,佢都直接避開算。即係點呀?以前係持住自己下體有金鐘罩保護,冇人入到佢中路,所以係無敵咁話啦?而家一冇咗條尿片金鐘罩就即刻淆底?哎喲~波波雞你原來係扮大抽啊。


就係因為咁,嗰日波波雞結交朋友並唔成功,我哋都決定由得佢算,幫佢著返條尿片,佢立即生猛晒。或者…始終佢習慣咗著片~一時之間冇咗又真係感覺幾怪嘅,俾著我都會擔心自己會唔會凍親下面。

 

有冇朋友好閒啫,都係自己活得自在食得開懷最緊要。

 20190401 10159 01

 

(以上專欄由Dr-Max教材大王全力支持)

田叔叔英語閱讀計劃2023-24
田叔叔英語閱讀計劃2023-24
 親子最關注
香港優質教育機構巡禮 2024