【珍寶豬欄】你究竟有冇廉恥

4193 000

睇完醫生,拎完藥之後

媽媽問我:「阿小姐,啲藥係咪飽肚食呀?」

我:「係呀」

媽媽同小朋友行埋一邊坐低咗睇吓啲藥。

隔咗陣,媽媽又過嚟問我:「佢啲藥係咪飽肚食㗎?」

我:「係呀~」

媽媽:「唔飽肚食會點㗎?」

哦,唔會變超人,唔會穿胃嘅

我:「食啲嘢先食藥好啲嘅」

媽媽:「但係你哋冇俾到嘢食我」

嗯?啊?吓?你講乜話?

我:「吓?」

媽媽:「我而家想同佢食咗藥先,但係你冇俾到嘢食我,咁點飽肚食藥呀?」

我:「岀去食啲嘢先再食藥啦~」

媽媽:「但係我想俾佢而家食喎」

我:「返屋企先食啦~」

媽媽:「我想而家俾佢食喎」

我:「岀面有間便利店嘅

媽媽:「你冇嘢食俾我咩?」

啲嘢食係我㗎!係我㗎!係我㗎!你做乜打我啲嘢食主意!啲零食全部係我自己買㗎!

我扮哂蟹:「吓,冇喎,診所邊有嘢食啊

媽媽:「你又叫我飽肚食,我個仔喺度食完藥唔舒服係咪你揹飛呀?」

我同事忍唔住媽媽嘅攻勢,同我講:「咪煩啦,你成箱零食喺度咪俾啲人囉。」

你!岀!賣!我!我哋做得同事係應該互相支持兼同一陣線㗎!

我同同事講:「我唔制呀,個個都打我啲零食主意,我咪食得屎?」

同事:「咪孤寒啦,幾多歲人呀?仲成日食埋啲立雜嘢你食到口腫面腫啦,仲食咁多呢啲嘢?」

同事一路碎碎唸,一路摷我個寶箱,再一路擺上枱面俾媽媽揀:「呢個?食呢個?呢個啱唔啱食?」企喺側邊嘅我,已經再俾唔到其他反應,只係不停講「你岀賣我你岀賣我你岀賣我⋯⋯

最後媽媽好滿意咁拎咗六七樣零食走。啲嘢食係我㗎

田叔叔英語閱讀計劃2023-24
田叔叔英語閱讀計劃2023-24
 親子最關注
香港優質教育機構巡禮 2024