9591

 

Teresa Mama,即係我老婆,上個星期結束左產假正式返工喇,卓欣BB揀咗9月22號出世,就只差幾個星期媽媽先有14周產假,結果而家就乖乖地去返工。 

講返老婆,以前細個都唔覺做媽媽有幾偉大架,但而家親身經歷老婆懷孕到生產嘅過程,就發覺生BB真係好偉大同艱鉅嘅工作。

 

20181208 9591 01

 

我建議所有男士都入去產房睇下支持下老婆,因為呢啲機會一生人可能得一次,唔好驚核突同肉酸唔入去。喺入面你可以睇到老婆點痛到神志不清。當日老婆入到產房準備生產,痛到猛問:係唔係有仙氣聞架。仲問咗幾次,雖然好衰但我真係要忍住笑,同老婆講係笑氣呀,但佢都係繼續講仙氣,就知有幾痛啦。

 

唔止咁呀,佢細細粒身軀真係出盡洪荒之力都搞好耐先生到卓欣出來。真係見住佢谷到塊面都紫曬,個姿勢好似睇龍珠悟空變超級撒亞人,連變嘅時間都好似悟空變超西咁幾集都未變到咁耐,我擔心佢仲多個BB,作為佢老公真係想喊,當然嗰下要忍住。

 20181208 9591 02

生左出嚟之後,佢無曬力氣瞓咗喺度,真係想唱返句:今天只有殘留的軀殼。要點形容呢個狀態呢?就好似你同佢講咩都係藍剔已讀不回,要充返少少電先覆到你。或者就好似OT咗十幾日,個客都仲同你講有嘢改咁。

 

之後經過痛苦同悶嘅坐月日子,辛苦完一輪,咁快就返工啦,收工返嚟又要照顧BB,做人媽媽真係唔易,各位做老公嘅得閒就幫下手,有咩事就學政府話更加包容下太太喇。

 

作者:Davis Papa

新手爸爸育有一女,現職電視台導演及網路媒體創作人

會員評分: 0 / 5

不啟用星號不啟用星號不啟用星號不啟用星號不啟用星號不啟用星號
 
×