2019-12-11, 週三

【有洋蔥!】泰父每日變裝氹植物人仔仔開心

人生真係今日唔知聽日事,少少嘅意外都可能會影響每個人嘅一生。泰國烏隆府嘅伊丘本身係一個健康嘅小朋友,但係2013年9月時,因為係外婆屋企打邊爐時唔小心被食物噎到,當時心臟更曾經停止跳動過,導致腦部缺氧太耐,變成值物人。

 【親子趣聞】泰父每日變裝氹植物人仔仔開心

伊丘住院數月,佢爸爸孔薩同老婆就決定將佢接返屋企,親手照料,孔薩更毅然辭職,留係屋企照顧伊丘。見住愛子轉眼由活潑小朋友變成咁,孔薩就選擇珍惜生命中嘅小幸福,佢認為,雖然無法回到過去,但起碼可以改變未來。伊丘生存到落嚟已經好好,無論佢已經咩都唔記得、咩都做唔到,但自己仍然記得,仍然可以照顧到佢。

【親子趣聞】泰父每日變裝氹植物人仔仔開心 

目前孔薩每日照顧仔仔之餘,仲會變裝俾伊丘睇,有時仲幫仔仔都扮埋一份,連囡囡都有時都會玩埋一份添!

【親子趣聞】泰父每日變裝氹植物人仔仔開心 

孔薩話,以前伊丘父親節送過佢手製卡片,佢當時只係抱抱佢,就收埋咗張卡,如果時光可倒流,佢一定會話佢聽爸爸好愛佢。而家仔仔可能未必知道爸爸好愛佢,但佢會以行動證明俾佢睇,爸爸嘅愛會照顧佢一世。孔薩將佢同仔仔嘅互動上傳到社交網絡,希望可以呼籲大家珍惜現在同未來,並希望將呢種精神感染大家。 

伊丘現時已經10歲,孔薩一家依然希望有日伊丘可以康復,孔薩指而家仔仔偶爾都會對住佢微微一笑,都會令到佢好開心。事件引起不少網友關注,大家都被呢份深深嘅父愛感動。有網民更為呢家人發起籌捐行動,希望可以幫助到佢地。

圖片來源:孔薩Facebook