【小胖阿七】《商品說明條例》幫到消費者 但有無矯枉過正？

最近，阿七去開旺角，就同個喺附近開格仔舖嘅朋友食晏。

大熱天時，咪同侍應落單：「凍檸茶，少甜少冰。」
「凍飲加三蚊喎。」
「ok。」
點完餐啦，但個朋友仲將個餐牌翻來翻去，唔知睇咩呢？隔咗一陣，朋友終於開聲：「佢應該喺餐牌寫返『凍飲加三蚊』。」
「佢口講咗都ok啦。」
「小心駛得萬年船呀，你都唔知有啲客幾X街。」
「唔會真係有人嘈卦？」
「我見過。」
「吓？」
「係呀，咪就係因為餐牌無寫，個侍應一時又唔記得講，到埋單時，個客就嘈。」
「三蚊啫。」
「個客話要報海關，用『商品說明條例』嚟告佢。」
「吓，使唔使咁誇呀，三蚊就豪俾佢囉。」
「係呀，人哋打開門做生意，個老細都怕咗佢，咪唔收佢嗰三蚊囉。」
「咁唯有小心啲，寫返清楚。」
「寫清楚都啱嘅，不過個老細最嬲就係咁小嘅事，就搵海關、『商品說明條例』嚟嚇佢。」
「咁又係呀，我就做唔出啦，宜家啲租咁鬼貴，小店好難生存架！」
「個個好似阿七你咁諗就好，我都遇過啲麻煩客。我開嗰間格仔舖，有一格就放咗啲小盆栽，賣80蚊一個，我上架嗰陣一時唔小心就標咗『8』蚊，有個阿媽同小朋友一齊入嚟，個阿媽就幫小朋友買小盆栽用嚟做功課。佢買嗰時，我一望，就知道自己標錯價，即刻好唔好意思咁同佢道歉，解釋係我搞錯咗。如果阿七你係個阿媽，你會點呀？」
「咁咪走人囉。」
「都話你人好架啦，祝你好心有好報呀。不過嗰個阿媽無放過我，佢話佢見到係八蚊，仲影咗相，仲好惡咁兇我，話如果我唔八蚊賣俾佢，佢就報海關，用『商品說明條例』嚟告我喎。」
「都未必告得入啦，我覺得你唔係有心誤導，同埋又唔係迫個客俾80蚊，可以唔交易架嘛。」
「我都知，但係嗰吓我心諗，一陣佢真係癲起上嚟去搵海關，海關一陣嚟查，都阻到我做生意，仲俾人以為我犯法。一陣唔好彩要上庭，咪又要問律師意見，搵律師都要錢，平極都要幾千啦。個客就一啲成本都無，我個成本就重到嘔。最後我就八蚊賣俾佢，當自己唔好彩啦，咪自己嘔番幾廿蚊出嚟囉，佢擺明就睇死我打開門口做生意唔想煩。」

「不過，佢無形嘅成本都重架，帶住個小朋友都唔好好去身教，應該教小朋友多啲體諒人哋嘅難處，第日個小朋友好自私同隨便去佔人便宜，個阿媽將來都要承受返呢個惡果。」

「不過，講開又講，我覺得海關都唔會幫商戶，海關梗係想捉人立功啦。」

「嗯，立法原意係好嘅，因為睇新聞，真係拉咗嗰啲迫人買咗幾十萬健身會籍嘅公司，又真係捉啲賣假貨嘅人，我覺得海關都係想破大案，對你嗰八十蚊應該無乜興趣。所以，你上次應該唔驚嘅。」

「都係嘅。不過，對啲無咩錢、唔識嘢、怕事嘅人嚟講，只不過犯咗個無心之失，但一聽嗰個客話要告你喎，成個心都怯埋啦。嗱，我認自己無錢唔識嘢同怕事，都係嗰句，打開門口做生意。」

有時話咩法律面前人人平等，但係對於有錢人嚟講，咩都可以請律師，容易走到法律罅，但係星斗小市民？無錢就慘啦，無律師保護，就無相關知識去保障自己嘅權益，仲會好易俾人嚇埋。呢個係好無奈嘅事實，惟有小心啲，學識去保護自己。同埋，都係要教好自己嘅小朋友，去感染身邊人，如果更加多善良嘅人，呢個世界就會更美好。

作者：小胖阿七
　　　本地保險業界先驅，40年前入行的首批從業員，見證無數高低起落，由高峰期的月入20萬的中環人，到突然要由零開始call單儲客，唔介意分享經驗，最緊要你哋聽完有錢落袋。