2020-10-26, 週一

【嘩!】湯中「異物」嚇到個心離一離

天下嘅父母都覺得子女永遠都係小朋友,即使子女已成家立室或是已為人父母,都一樣會掛心。

經常都擔心佢哋食得飽唔飽、著得夠唔夠暖,最普遍嘅係間中會煲下老火湯畀佢哋補下咁!事情就係咁發生…

話說我朋友同我一樣,都係一個在職媽媽,平日返工時,囡囡就由婆婆照顧。咁佢有日如常收工返屋企,就發現阿媽煲咗湯畀佢,正想飲之際,一打開煲蓋,就發現咗一舊非常嘔心嘅不明物體,即時嚇得魂飛魄散,心都離一離!

【親子趣聞】湯中「異物」嚇到個心離一離

就係呢舊喇!究竟邊個咁大整蠱,好玩唔好玩屎?!

佢就即時走去問阿媽發生咩事啦!原來,呢舊疑似屎嘅物體叫「熟地」,係中藥材嘅一種,平時應該係切到一片片咁嘅,但因為阿媽話呢個熟地好硬佢切唔開,所以就索性成舊擺落去煲!

原來係誤會嚟嘅,無事無事!

【親子趣聞】湯中「異物」嚇到個心離一離

而呢煲湯亦有名堂嘅,叫「四物湯」,湯料以中藥材「當歸、川芎、白芍、熟地」為主,據稱有補血養血功效,通常係產後婦女、或者有貧血問題嘅女生飲用。不過經我上網資料搜集過之後,就發現有中醫話唔係人人都適合飲四物湯進補,大家若要煲中藥材湯時,都係問下中醫意見先比較穩陣。