2019-11-17, 週日

【新年大統計】派利是攻略

新年一步步逼近,開心背後其實媽咪們已為過年做足準備!首先我地要唱定新銀紙,走訪各大商場拎盡免費利是封,部分媽咪仲會做埋理財,諗定要派俾邊d人,為利是「支出」做一個初步預算!

 20170120 5870 a1

圖片:網絡

不過派利是其實都係一門學問,每個家庭嘅習慣可能不一,如果你係第一年派,就一定要花花心思去了解。所以我地第一步就係要:

1.了解自己家庭文化

有家庭會派利是比長輩同未婚兄弟姊妹,有d就唔會!如果未了解就跟足朋友果套而派漏利是,分分鐘得罪咗人都唔知!

2.夫妻同場,一人派發

唔係話「姑寒」或者小心眼,但係利是背後始終都係錢,我果頭比完幾封$100個姪仔,老公又整兩封比佢咁仲得了﹗新年話長唔長話短唔短,每次派多$400-$500你都咪話唔多。

最重要係男人普遍講面子,講兩講又比一封唔識節制,唔熟果d都係比最大面額,所以避免「超支」都係搵是但一個派就好啦。

3.利是封分類面額

派利是話就係話一份心意,但心意都要分輕重!熟果d親戚同小朋友難免會封多d,準備定唔同Size、唔同款式嘅利是封,分好邊d係$500、$100、$50、$20甚至金幣朱古力(依家應該無人會派),到時就唔驚比少或者比多!

4.利是封款式

喜慶日子應該避免某些敏感顏色,例如白色、藍色等。你可能會問邊度有利是封用呢d色咁唔識做!事實上因為有部分利是封涉及商標人物,例如各式卡通人物,所以都有機會用以上敏感顏色做主色,如果長輩係比較傳統嘅人,就唔好派呢類利是封比佢地啦!

5.好事成雙

利是講「意頭」,尤其係新婚人士,第一年派當然要雙雙對對。所以就算係派比同事,樓下看更都盡量比兩封,面額就自行分配啦。

最後預祝大家有個愉快嘅新年,同埋好好享受新年期間樓下看更同酒樓啊姐嘅服務質素同態度直線上升,不過你要識做呢!

圖片:網絡