2019-10-23, 週三

【Davis Papa】粒孫是爺爺嫲嫲嘅第二春

9530

生BB添加新嘅家庭成員,最開心除左父母之外,就一定係四大長老。

20181122 9530 F01

好似我屋企兩位長老(阿爺阿嫲),我可以話係睇住佢地係我老婆產前產後的心理及心態轉變。要形容呢個轉變,我覺得好似鯰魚效率嘅沙甸魚咁,一有個孫就好活躍,可以話激活成個人生。

 

首先,講講卓欣阿嫲先,有時夜晚卓欣扭計爆喊,我同老婆哄極都唔掂嘅時候,嫲嫲就會爆門衝入黎幫手。阿嫲衝入黎抱起卓欣果下真係好有型,我兩公婆心諗:嘩,神奇女俠呀!!卓欣俾佢抱兩下又真係唔喊喎。

 

20181122 9530 F02

之後到佢阿爺喇,可以話見到佢久違了的慈父樣。就算卓欣幾扭計喊有幾嘈,佢都會話:哎呀,做咩扭計豬呀,成日要人錫。但轉個頭就會話:卓欣都好過你個衰仔,嗰時係又喊唔係又喊幾難湊。我心諗咪又係差唔多。Whataspp 仲係咁轉個孫女嘅相,我立眼仲以為我個女識得whatsapp同我講緊野。

 

佢地平時放假飲個茶食個包,行百貨公司,再放假再飲個茶食個包,又行百貨公司,周而復始。而家識去名牌睇下有咩BB衫俾個孫,話要買G字牌又B字牌俾佢。喂!阿爸阿媽,我呢?你個仔無衫著呀。

 

一啲都唔誇張,基本上咩補品都唔洗架喇,有個孫就精神曬。而家有卓欣成個家庭都熱鬧起黎,都算一個唔錯嘅意外收穫。

 

作者:Davis Papa
新手爸爸養有一女,現職電視台導演及網路媒體創作人