【淘寶好物分享】十零蚊超靚360度花花口水肩

而BB界近期最流行嘅款式呢，就係今次介紹嘅360度花花型口水肩。係呀！BB界都有Fashion Trend架！

媽媽我最近就喺淘寶買咗好幾條新款嘅360度口水肩，唔好以為淘寶就無好嘢，事實上坊間有好多賣緊幾十蚊嘅360度口水肩都係購自淘寶，只要前事清洗乾淨，問題不大嘅。至於我買嘅呢堆口水肩呢，就只係十零蚊人仔啫。

媽媽我好喜愛呢兩條純棉紗布360度花花口水肩(14.5人民幣)，可雙面使用，聲稱無螢光劑，感覺好舒適。

呢堆花花同星星型嘅360度口水肩(10.8人民幣)，係新色新款嚟架，春日Feel呀！

點睇得出佢係新款呢？就係呢度，鈕扣位係有四粒架，可以調整闊度(舊款得平排兩粒鈕)。

口水肩之外，由於小兒超級「反瞓」、經常踢被，媽媽我就再淘咗一張防踢被。提到防踢被，好多媽媽都追捧「Hoppetta六層紗蘑菇防踢被」同埋「西松屋六層紗防踢被」，呢兩款日本進口嘅防踢被固然有其優勢，品質亦有一定保證，不過定價就略高一點囉。

因為小兒已不是初生嬰兒，相信其抵抗力應該愈來愈高(Touchwood)。加上媽媽我勇者無懼！唔怕中國製的會爆炸，所以就選購咗呢款來自淘寶店、只索價68蚊人仔嘅六層紗防踢被。

雖然100% Made In China，不過外形設計無走樣，皇冠圖案我幾喜愛，質地都好柔軟吖。

膊位的扭扣都好光滑，無刮手呀。

單憑目測及觸摸並唔能夠驗證到防踢被是否採用六層紗，不過手感幾好呀，好厚實呀！親！

媽媽我真係有畀小兒用架，佢好似著得好舒適咁。當然媽媽我事前已徹底清潔並消毒乾淨張被，仲喺好天時曝曬過一輪！

另外仲淘咗兩條汗巾(8.8人民幣)，畀小朋友「攝」喺背脊吸汗用。

一邊橫間紗巾料、另一邊係毛巾料。

最後睇下360度口水肩戴上頸係點樣啦！

我覺得呢條好靚喎真係，同埋佢本人應該都喜愛嘅，只係媽媽我影得耐佢唔多耐煩先咁樣望住鏡頭啫，無事嘅！另，有冇留意小兒件灰色夾衣？係媽媽我上次去Gap Outlet買架！都係幾十蚊咋！【1.5折激筍GAP OUTLET】http://bit.ly/2buty4X

最後溫馨提示，想淘以上貨品嘅媽媽，可以關鍵字Search「360度口水巾」、「寶寶防踢被」、「嬰兒汗巾」等字眼。另亦最好選擇有「天貓」或是有大量用家正評並附有實物圖回應的淘寶店，品質上會比較有依據。