【網購月經】媽咪又中伏 開Page聲討黑店

今次引起媽咪圍攻嘅係Baby Shop美國入口嬰兒用品專門店，眾多媽咪表示自己被拖貨，或者收咗錢但無相關人士作跟進服務。一眾苦主於是開咗個聲討Baby Shop 美國入口嬰兒用品專門店專頁！

翻查後發現呢間網店都唔係第一次比人話服務有問題，早至半年前已經有媽咪出聲佢地收錢拖貨。簡單嚟講就係貼錢買難受，錢比咗貨又唔知幾時有，即使最後有貨都拖你兩三個月，過程中你又要追數又驚比人呃，咁嘅服務態度難怪激起眾怒。

總括嚟講呢間網店衰服務差，呃客人有貨到最後安唔安排到就另一回事，當然退錢方面就有人成功有人仍然努力追緊數，買嘢買到辛苦返自己，畀著我都嬲！

*網民仲透露有幾間網店Page都疑似係呢間公司管理

以下幾點媽咪一定要記住：

1.網店交易方式

好多時網店嘅交易方式都係消費者同店家之間私下進行，冇正式系統登記好容易出事。單靠一張入數紙實在難以保障自己，更何況上述網店即使擁有唔少顧客，更設有自己網頁，但都一樣出事！所以只要店主突然人間蒸發，好多時消費者都束手無策。

2.無法接觸商品

網購第二風險就係消費者接觸唔到產品，即使賣家出售嘅產品都係你用開，但難保到時會貨不對辦。

3.有打手存在

好多時媽咪都唔係蠢得曬，選擇網店都會好小心，盡量會揀多Like數同多留言嘅Page。但係千祈唔好忘記呢個世界上有「打手」存在，你所見到嘅墟冚情況可能只係假象！

圖片截自網絡