2019-11-22, 週五

【史高治叔叔】電子錢包鬥搶佔有率 邊個有jetso就盡拎

10685

話說史高治有個朋友,早排書展擺攤位,嗰陣佢忙到不得了,見佢呢期得閒啲,就約咗佢飲杯咖啡。

20190819 10685 k01

「喂,今年書展生意點呀?主辦單位話有近100萬人次喎。」
「點會有呀?呃鬼咩!我同啲行家喺書展擺咗咁多年,目測都知今年少咗好多人啦!」
「咁嗰次我同老婆阿女星期日朝頭早入書展,都覺得唔使點排隊,鬆鬆動動咁。」
「簡直可以打保齡球啦。」
「有無咁誇張呀?見你個攤位都有啲客。」
「你嚟嗰時係朝頭早嘛,我啲客多數都好似你咁帶住小朋友,一到下晝,個個都急急腳走人啦,仲邊度有人帶小朋友入嚟,嗰日警察要遊行隊伍喺灣仔停,一吓子全部逼晒喺灣仔,帶住小朋友都會驚啦。」
「咁又係,我哋嗰日行完,都拿拿林搭船去尖沙嘴。」
「跟住星期日晚元朗又爆單大嘢,搞到跟住個星期一仲冷清,有啲人驚到唔敢出街,有啲人就無心情出街,仲有啲細嘅出版社個攤位直頭罷市。所以我先唔信佢話有近100萬人次!」
睇嚟朋友啲生意都麻麻地,史高治都係轉吓話題。
「呀,嗰日我入去時見到用AlipayHK買正價門票可以減5蚊。」
「唓,25蚊先減得嗰5蚊,無咩用,我啲爸媽客好鬼精打細算,朝早入場先係10蚊雞之嘛。」
「咁又係,我老婆都係寧願早啲出門口,都要買10蚊飛。」
「不過如果講書展優惠,今次Payme比較矚目。我去咗另一間攤位幫阿仔買兩本科幻小說,嗰個攤位有得用Payme,買150蚊就減20蚊,呢個優惠仲吸引啦!我都即刻用咗,之後去Payme個攤位,因為要拎單去refund嗰20蚊,佢再送個遊戲幣俾我去玩夾公仔機,大家喺度夾公仔,吸引埋啲人去睇,呢個promotion正好多囉。」
「咦,咁Payme今次型好多喎!同埋我喺銀行做,梗係撐香港銀行嘅App啦!」
「Payme方便喎,同朋友食飯後夾錢,普遍都係鍾意用Payme,大家只會問人哋有無Payme,嘿嘿,而唔會問人哋有無AlipayHK。」
「咁始終喺香港,用香港嘢係好正常呀。不過,呢啲支付平台都真係好有米,好似個AlipayHK買書展入場飛個5蚊擺明就係佢哋俾出嚟啦,如果100萬人入場都用AlipayHK俾錢,咁AlipayHK咪要俾成500萬出嚟?」
「唉,邊有100萬人呀?」
都係史高治唔好,又提起朋友嘅傷心事,都係唔好再講書展啦!
「呀,呢啲支付平台為咗爭市場,都有唔少優惠,對我哋消費者嚟講,都幾抵吓,我見啲師奶仔好鐘意咁。」
「都係嘅,咁有多幾個支付方法,消費者方便咗,又有啲著數拎吓,消費得開心啲,對我哋做生意嚟講都係有好處。」
不過,史高治成日都諗,喺大陸就逼住要用AlipayHK同微信支付,根本唔用都唔得。但喺香港,就有好多選擇,信用卡又好,八達通又好,其實好方便,最緊要係用慣咗。除非好似Payme咁,搞到個個朋友同你食完飯,都問:「可唔可以Payme返你?」,咁自自然然拎市場佔有率。否則,其他新嘅支付平台真係要有優惠先可以吸引到消費者,都無咩loyalty可言。

點都好啦,史高治支持消費者有jetso就盡拎,無jetso就唔好用啦,然後即管放長雙眼,睇吓啲jetso派到幾耐。

 

作者:史高治叔叔
   後生嗰陣,大學一畢業就入咗大銀行商業部做Sales,跟一班有名有利嘅客人打交道,有時可以跟埋一齊飲飲食食,花天酒地、燈紅酒綠嘅生活,造就今日呢個身經百戰又識玩識食嘅嘅叔叔。不過自從做咗老竇之後,史高治叔叔修心養性,決定將行內鮮為人知嘅見聞,喺專欄裡面一一公開。