2019-10-19, 週六

【史高治叔叔】秒秒鐘幾廿萬上落 邊度攞錢方便過銀行?

10709 20190826

人生在世,見到越嚟越多難以理解嘅事。話說史高治日日睇電視睇手機,煙霧瀰漫嘅畫面睇到個人灰晒,又話晒而家仲係暑假,不如搵日近近地去澳門玩吓散散心。

20190826 10709 k01

叔叔細個去澳門,梗有幾個鐘係由親戚帶去行街食嘢,阿爸阿媽會突然消失咗一個下晝。後來大個咗先知,原來佢哋去咗搵何生玩遊戲……不過,呢個係以前嘅事喇,而家澳門啲賭場多元化到可以當親子遊目的地,可以大有大玩,細有細玩。咁啱上星期有個客有船飛,請史高治一家齊齊過大海,史高治一方面可以跟個客入賭場見識,老婆又可以帶阿女享受吓酒店設施,一家三口玩個weekend。

史高治好日都唔去一次澳門,今次去住嗰間以歐洲城巿做主題嘅賭場酒店,無諗過原來有咁多親子元素,大把地方俾阿女放電,入面有啲滑梯、繩橋、攀爬障礙物等,仲有小朋友最鍾意嘅波波池同遊戲機。除咗俾阿囡玩餐飽之外,仲有一啲可以俾大人同小朋友一齊玩嘅遊戲。最衰當日天氣麻麻地,如果唔係可以去埋戶外遊樂場。

阿女玩到夠自然就要返房瞓晏覺,我就趁機會去賭場搵個客,話晒人哋請我一家過嚟,都要去打個招呼。阿客帶史高治去VIP貴賓廳,話明係貴賓廳,真係賭一局都唔嘢少,我眼見起標都幾萬蚊,有啲仲幾百萬上落。雖然史高治喺銀行見慣咁多個零,但係賭枱都真係第一次。之後,阿客話玩夠想攞啲錢走,見佢就咁攞住啲籌碼行埋去話要兌換200萬,職員就好從容咁問都唔駛問,數咗200萬現金俾佢,幫佢入起兩個袋仔,阿客就好似攞外賣咁拎住走,成個過程簡單到不得了。

呢個情境史高治覺得幾有趣。阿客本身係我銀行嘅大額存戶,估唔到佢原來喺賭場都仲有咁大筆錢。最妙嘅係賭場唔會好似銀行咁,攞幾萬蚊現金已經要查身份證,再拎多少少又會問長問短,因為銀行有防止洗黑錢同《稅務條例》,如果好似佢咁攞兩球走,一定要客戶提款前打電話去預約再由專人招呼,因為一來分行未必有咁多現金,二來都有責任問清楚詳情。

行出門口,史高治鼓起勇氣,將心入面諗到但一直唔敢問嘅問題講出嚟:「其實呢,有冇人會當賭場係銀行咁用?」

阿客望咗我一望,個表情好似想話「果然係做銀行呀吓咁都俾你諗到」。佢亦不諱言:「我好多朋友都會咁做,因為喺澳門都有啲生意,當買個方便。嗱,見同你熟先講,如果你見到其他人攞錢,出出入入多到唔當啲錢係錢,咁就最好唔好問咁多喇。」其實都唔難想像嘅,賭場啲錢銀流向可以好「自由」,咁澳門又係靠博彩業做經濟支柱吖嘛。

其實,人越大就越發現世界好複雜。史高治呢刻又回想起細個嗰時,賭場係兒童禁地,因為始終係財色酒氣嘅地方,家長都唔會想子女被污染。不過,到咗而家呢個年代,要污染嘅又點避得過,不如早啲同小朋友講現實世界就係咁,等佢哋知道世界有好多荒謬嘅事情,引導佢哋自己思考下當中錯或對。尤其是喺呢啲時勢,更加要教小朋友獨立思考,從中灌輸正確嘅觀念,等佢哋長大之後做個有見識亦有良知嘅人。無論世界多壞,都希望小朋友將來唔好變壞,如果有能力,就更加要為呢個社會做多啲好事。

 

作者:史高治叔叔
   後生嗰陣,大學一畢業就入咗大銀行商業部做Sales,跟一班有名有利嘅客人打交道,有時可以跟埋一齊飲飲食食,花天酒地、燈紅酒綠嘅生活,造就今日呢個身經百戰又識玩識食嘅嘅叔叔。不過自從做咗老竇之後,史高治叔叔修心養性,決定將行內鮮為人知嘅見聞,喺專欄裡面一一公開。