2019-09-19, 週四

【珍寶豬欄】放手吧!媽媽

有日一位媽媽同佢嘅十幾歲囝囝嚟到診所,登記後…

媽媽叮囑囝囝:記唔記得一陣點同醫生叔叔講?

【珍寶豬欄】放手吧!媽媽

圖片:珍寶豬

 

囝囝點頭:記得~

媽媽:記得要同醫生叔叔講你有咳有痰有鼻水,噚晚有發燒…記得未?

囝囝:記得~

媽媽:咁你講一次俾我知呀,你當我係醫生叔叔呀~

囝囝:醫生叔叔,早晨你好,我今日唔舒服…我有…有…有…

其實我都唔想阻住你哋玩角色扮演,不過真係到你哋了:小朋友,可以入去見醫生啦~

囝囝雙手握拳,身體僵硬咁企起身…

媽媽拍一拍囝的結實屁屁,單手握拳做出加油姿勢:入去啦!

囝囝大步大步走入醫生房,「嘭!」醫生房門關上了…媽媽見證住囝囝嘅成長而感動了…

不過感動得嗰半分鐘,媽媽隔住醫生房門:囝,你得唔得呀?識唔識講呀?記唔記得同醫生叔叔點講呀?囝呀?(拍門,拍門)

醫生開門:太太,你係咪想入嚟陪佢睇?

媽媽耍手擰頭:唔係~唔係~我怕佢唔識講啫…

醫生:你唔俾佢試,你永遠都唔會知道佢有幾叻,放心俾佢試吓啦~

媽媽冇再拍門,冇再隔門問診…只有默默等待~終於佢等到門再開了!

踏出醫生房嘅囝囝臉上展露勝利笑容~

媽媽:叻仔!

媽媽,你個囝係比你想像中強大,放手放膽放心俾佢學習吧~

 

×