2020-07-11, 週六

【珍寶豬欄】好命嘅尚有全屍 唔好命嘅全已化屎

9383

 

我家班大帝係好為食嘅,凡係佢哋知道食得嘅嘢,不論人食定寵物食嘅,佢哋都會有興趣。好多時一不留神,就會見到包裝袋被撕咬,好命嘅尚有全屍,唔好命嘅全已化屎…

20181015 9383 01

教係得教嘅~首先需要教嘅係自己先。每次發現零食被偷食後,好多人第一個反應會係『有冇搞錯呀?偷食零食?』,繼而就會捉住隻狗或貓又打又罰話一番。但係捉賊都要拿贓呀,如果你唔係當時見到佢撕咬緊個包裝袋,你只係返到屋企見到凋零嘅碎屍,你再打佢話佢,佢都可能已經唔記得發生咩事。佢好大可能只會覺得點解佢開心迎接你返屋企之後就係俾人打同鬧?
其實首先要自己收好啲零食先,因為屋企唔係你一人獨享,你需要嘅係顧吓寵物感受先。俾著係你,你一日廿四小時都喺一間屋度,人生真係除咗食屙瞓就冇其他嘢做,你悶唔悶先?口唔口痕先?口痕搵嘢食係本性嚟,見到好似擺得入口就咬㗎啦,食落又幾啱口味就吞㗎啦~如果我係動物,我鬼識分咩係人食定寵物食咩,我又唔識字。


所以我哋作為識字識分咩係佢哋食得或唔食得嘅人類,我哋應該好好放好啲零食同任何物件。唔好到佢食咗之後先教訓佢做咩食咗你啲嘢~你應該問自己『係咪你冇放好啲嘢』。如果見到佢食咗一啲唔應該食嘅嘢,亦請麻煩你好好觀察佢身體狀況有冇異樣,如果你係愛錫佢嘅係應該好好保護佢。