2019-09-17, 週二

【珍寶豬欄】點解請我食檸檬

20190205 9839 01

有日滂沱大雨~診所入面有幾個人喺度等緊睇醫生。

有位先生入到嚟企咗喺門邊,我望望佢,佢唔望我… 我唯有嗌嗌佢:「先生,係咪睇醫生呀?」

佢望望我,之後伸手去遮架拎起一把遮:「唔係呀,我嚟拎返我把遮。」

喺佢拎起把遮時,坐喺度嘅一位女士嗌住佢:「呢把遮我㗎喎。」

佢即刻放低:「係咩?唔好意思,認錯認錯。」

其他病人嘅視線都望住佢~ 佢再拎起另一把遮,另一位男士又嗌住佢:「喂,你做咩呀?」

佢:「哎,又攞錯。」

我問佢:「先生,你把遮係幾時漏咗喺度㗎?今朝?」

佢:「好耐啦。」

我:「有幾耐呀?你把遮咩色㗎?」

佢:「唔記得啦,我擺咗喺度好耐㗎啦。」

我望望遮架:「呢度啲遮應該都係而家坐喺度嘅人啊,應該冇一把係你㗎喎?我哋之前都唔覺有人漏咗把遮喺度呀。」

佢:「係咪俾人攞咗你唔知呀?」

我:「連你都唔記得漏咗幾耐同咩樣嘅,之前俾人攞咗都唔奇嘅。」

佢:「我而家要用遮喎,出面咁大雨。」

我:「你睇吓有冇邊把遮係冇人嘅?」

佢逐把遮拎起,每把遮都有人認頭。

佢問我:「咁點算呀?我把遮就俾人攞咗,吓?你又唔同我好好keep住,我而家冇遮用呀。」

我:「我哋診所唔幫人keep遮㗎嘛。」

佢:「你都幾黑心㗎喎,唔通要我出去淋雨啦喎?」

我:「你鍾意嘅可以喺度等雨停啊~」

佢:「我就係唔鍾意你呀!」

眾人視線轉移到我身上… 先生拂袖而去~

點解明明係講緊一把遮,都要請我食檸檬… 

(以上專欄由Dr-Max教材大王全力支持)

×