2019-11-19, 週二

【珍寶豬欄】屋企人有咩咁重要呀?

9993

電話響起~

我:「你好,乜乜診所。」
佢:「今日收幾點呀?我收工過嚟呀。」

我:「今日中秋會提早收,五點前過嚟就有醫生睇~」
佢:「五點?平時你收幾點呀?」
我:「平時七點半截症嘅。」

佢:「駛唔駛早咁多收呀?我都未收工


要唔要接埋你收工呀咁?


我:「今日中秋嘛,醫生會早啲走嘅
佢:「聽日咪補咗日假囉,早咩放呀你哋?貪得無厭成咁㗎咩?」


吓?你老闆成日見你放假都會咁話你㗎?


我:「我哋聽日都會開半日嘅
佢:「係囉!咁你哋都有半日補假呀,今日仲放咩早呀?憑咩呀?」


憑我老闆係老闆,佢話事㗎囉。


我:「呢個係醫生決定㗎~唔係我哋話事㗎,總之今日五點前嚟到就有醫生睇啦~」
佢:「我收六點呀!我返到嚟咩都冇啦?」
我:「係呀小姐,過咗五點就冇醫生睇㗎啦
佢:「會閘都落埋呀?」
我:「係呀
佢:「痴線㗎咩!連閘都要落?」


收工唔落閘,唔通打開對門俾你入嚟坐呀?


我:「小姐,我哋聽日都開半日㗎,你可以聽朝嚟睇,又或者今晚去睇吓有冇其他診所開~」
佢:「我睇開你㗎喎!你當我係咩呀?」
試吓其他口味啦,唔好咁獨沽一味啦~可能你試過其他會覺得仲正呢。
佢繼續講:「你同醫生講我係邊個呀!佢一定會等我㗎!佢知我成日嚟睇佢㗎!」
我:「哦?係呀?請問小姐你叫咩名呀?有冇覆診卡號碼俾我呀?」
佢:「numberXXXXX」


我睇睇排版,六年內睇咗十次以內…有啲人一個月嚟十次就真係叫成日啦~我諗小姐你唔會想得到呢個『榮譽』卦?

我:「喂?小姐,醫生今日要早啲返屋企做節啊,佢都係會五點就走㗎啦~」
佢崩潰了:「屋企人有咩咁重要呀?我先係最重要呀!叫佢食死佢啦!」


嘟。我被cut線了….

 

醫生,你哋之間係咪有啲咩嘢而我唔知嘅?

 珍寶豬欄

(以上專欄由Dr-Max教材大王全力支持)