2019-11-20, 週三

【甘寧老師】闖珠峰情境練習

曾燕紅老師成為香港第一位女性登頂珠峰,本應該係一件值得恭賀,令香港人全城興奮嘅事,但網民竟然反應兩極,觸發點係佢喺登頂後接受訪問時曾經講過,喺上山途中遇到有登山客嚴重不適,衡量過安全因素後,就算畀晒氧氣嗰位登山客,佢都唔會有命落到山,因為氧氣數量根本唔夠同冇人幫佢,於是佢覺得自己嘅能力範圍幫唔到,就繼續登頂之旅。

20170602 6972 001

 

跟著一班企喺「道德高地」嘅判官就坐喺部電腦前面,狠狠地抽打佢話佢「見死不救」、「理想喺生命前不值一提,請檢討」等等批評嘅說話。

但我希望各位家長真係千萬參與唔好鬧埋一份,反而更加要同你嘅小朋友一齊探討吓呢個情境題,睇睇小朋友會點揀。

當然前提係要同佢講晒所有外在環境因素畀佢分析,包括簽生死狀、氧氣到嗰陣唔再係免費物品、天氣可能會越來越惡劣,惡劣到可能根本行唔到、甚至短暫失明等等,又畀近期嘅相關新聞小朋友睇,最緊要係,教識佢地識得設身處地,如果當時你係佢,你會點做。

無論小朋友嘅選擇係點都好,都要尊重佢嘅想法,要聽佢做呢個決定嘅原因,更加唔好強加自己意見逼佢同意你,因為無論我同你,還是佢,都根本唔可能知道當時嘅環境有幾咁惡劣,只能盡力憑空想像,所以根本冇所謂嘅對與錯,只係好純粹嘅一個選擇題。而呢次全面嘅分析對小朋友嚟講會係一個好好嘅練習,去學習減少倚賴,而且根據手上嘅資料、知識、學識自行做決定。

希望各位明白,匿喺鍵盤後面啦﹗作出批評好容易亦都好廉價,因為根本唔需要負咩責任。

但要懂得客觀分析就唔係一件容易嘅事,尤其是喺現今嘅香港,好多時候現實會令我地嘅情感往往主宰理性,但就係因為咁,我地先更加要教好下一代,喺佢地認清社會嘅殘酷之前,學懂分析,長大先可以與眾不同,唔會咁容易就失去主見,做一個跟風嘅機械人。