2019-09-23, 週一

【珍寶豬欄】不如試吓俾班女索吓雞屁股味

0115

 

波波雞喺屋企…係冇朋友嘅。

呢年幾以嚟,我留意咗好耐~佢真係乞貓憎乞狗憎得好緊要。B婆離遠見到佢想行埋嚟,就會一嘢狗衝想去咬佢咁款。頭頭卷卷MEME見到佢都會寧願行開避開佢,米米就好些少,係有時心情可能麻麻一見到波波雞就會兜巴星埋去…


究竟點解波波雞入咗屋咁耐都冇朋友嘅呢?除咗佢本身性格賤人之外,我懷疑係因為佢著咗尿片。自古以嚟,動物結交朋友都係由屁股開始,一埋身就隻隻都係走去聞屁股先嘅,有時一大班新相識嘅狗仔見到面就會大家玩屁股版嘅氹氹轉菊花園。可能你屁股陣味我幾喜歡就同你做朋友,臭味相投之類咁卦。

【珍寶豬欄】不如試吓俾班女索吓雞屁股味

有一日我就喺度諗『不如試吓俾班女索吓雞屁股味呀?大家做個好朋友呀?』,於是我除咗雞條尿片,抱住雞,將雞屁股隊埋去頭頭度…頭頭不滿地喵咗一聲即刻走,卷卷又係,MEME都係…米米直程黑我面。見到咁,我唔敢拎雞屁股去試試B婆反應啦,我怕B婆一嘢咬到佢標屎…


呢一次之後我冇再強迫佢哋聞雞屁股,我又開始諗,以前收養米米返嚟嗰時,米米都一樣係冇朋友。不過到收養咗雞返嚟之後,米米就開始同其他貓Friend咗,會見到佢哋閒時互相整理吓對方啲毛毛,又會一齊曬日光浴,一齊對抗波波雞,應該係『有同樣嘅敵人就係盟友』。


如果真係咁,波波雞你呢世都應該冇朋友㗎啦,因為我收山啦,唔會再收養多一隻返嚟,淨係你一隻都已經夠頭痕…

 

(以上專欄由Dr-Max教材大王全力支持)

×