【珍寶豬欄】明知佢得返唔多日子都要遺棄佢嗎？

嗰晚我問咗幾個朋友，佢哋都不約而同話呢個季節收貓B都已經好爆好忙，真係收唔到多一隻大貓…喺兩日後，讀者已經話我知隻貓貓半夜離世了。

遺棄貓貓喺美孚嘅主人，你明知佢得返唔多日子都仲要遺棄佢嗎？你明知佢嘅世界淨係得你又或者佢最信任最有安全感嘅地方係你屋企，你都仲要遺棄佢嗎？不過我知道你一定冇考慮過呢啲嘢，因為你根本冇良心，你有嘅話一定做唔出咁嘅事。有病，年紀大就要俾主人掉出街嘅呢啲事，都已經唔係咩新鮮事…遺棄佢哋嘅人總會有一大堆藉口去合理化自己嘅行為。『我冇能力照顧到啦！』『醫佢要用好多錢呀』『我唔忍心睇住佢死』，一條生命就係因為呢啲理由俾人冷酷無情咁掉出街，係一條生命，有感覺有感情有記憶，心臟仍然識得跳動…並唔係一個毛公仔。

你遺棄佢時，最後一句說話係講咗啲咩啊？

你由第一日拎佢返屋企養時，你又係講咗啲咩啊？

你可能已經記唔起，但係佢永遠都會記得你嘅所有…直到你真正離開佢，佢離開世界時。因為佢將你當成係佢生命中最重要嘅家人，而你…冇當過佢係真正嘅家人。

（以上專欄由Dr-Max教材大王全力支持）